بنتى خامس
سنه بتصوم
.................
بنتى نور عينى حلوه زى العسل
خامس سنه ف العموم بتصوم
شاطره وصيامها نوم متصل
وبالعافيه فى السحور بتقوم
واخده دبلومه فى الكسل
وعامله دكتوراه فى النوم
عاشقه الكلام والحجج
والشرح والبراهين
لسه بتبدل سنانها
وفاضل يادوب نابين
عايزه تفطر عشانهم
مش شهر.... لأ سنتين
وعشان تثبتلى الشطاره
وفهمها فى الدين
بدليل كمان واماره
تفرق لناس صايمين
عن كل ناب كفاره
وتفطر المساكين
وبتلمح كده بإشاره
دواها فى البروتين
فراخ ولحمه وكباب
شهرين متتاليين
قولتلها ياسلام ياسلام
جبتى الكلام ده منين
قولى كلام يطاق
ويدخل الودنين
مافيش على الإطلاق
إزاى وامتى وفين
دى كفارة ظهار وطلاق
مش ناب ولا نابين
صومى بلاش عفرته
هتلعبى على مين
ودواكى بالمضمضه
يوم ولا يومين
مش فراخ وكباب
أنسى يانور العين
مش ناقصه تانى قروض
بالقسط مش واكلين
والخضوع مرفوض
لشلة الملاعين
استغفرى واتوضى
واستعيذى م الشياطين
وبقلب ادعى لربى
وقولى بعده أمين
يحمى سمايا وارضى
ويحميكى يافلسطين
ويعيد علينا العام
راضيين ومرضيين
بخير وصحه تمام
زايدين ومش ناقصين
محمد وحيد.
ليست هناك تعليقات:
إرسال تعليق