غربه!!! ٦١
وف الغربه ده مش توبك
ولا انت ولا كونك
دراعك بس ف عونك
طاير ريشه مفيش عيشه
ولون تاني ماهوش لونك
وساعات ودقايقها تتخفي
وتوهه وفاقد الدفه
مفيش اول مفيش آخر
مفيش يد تكون عونك
ومن هم لهم تكفي
يزيد حملك يطول املك
وفكر وحمل ف الكفه
وتاه عنتر مفيش عبله
وتاه منه هدي القبله
وماشي والادين ف الجيب
والله معين...
حبيس بين الاصول والعيب
عيونك متعلقه ببتارين
ومن بترينه لبترينه
مفيش نيه للشرا جواك
وحصره بنظره وحزينه
مفيش فكه تجيب حاجه
لكن عينك هناك سارحه
ومشغوله بولا حاجه
وشارد ودفاك بارد
ونيس بيهل شبح مارد
ومستني من السما لملاك
يمحي من جواك الويل
غيام والشارع طويل
ضباب خيم يزيد الليل
وانا ماشي نسيت اسمي
مفيش خل يناديني
مفيش حيل يساعد حيل
غريق ماشي ع الاسفلت
ومحتاج مين يعديني
يطبطب ع الكتاف مره
ولو كلمه تهديني
يروح يومك بقي امبارح
واديك سارح ...وبكره مجاش
معايا ف شنطتي احلام
حاضنه معاها كام هدمه
مع قطفه لاحلي كلام
وفيه من ريحه امي
ودمعه كات بترمي سلام
وفيها من حيطان بيتنا
وفيها شويه من ضحكه
انا واصحابي ولمتنا
وع كتفي شايل همي
شايف بس متغمي
وحاسس اني انا بحجل
ومش بمشي
ودمعي بيمسحو كمي
وبتفحص كل تفصيله
لون الليل. مش هو
خيوط الفجر مش هي
مفيش نسمه منديه
ويدوب اغفل ف تعسيله
وقوم تاني ادور امشي
نفس طالع و مش محسوب
ومش ليا ولا منسوب
مجهول بالنسبه لي مكتوب
ومين يسمع آهات المي
تاهت رايتي وتاه علمي
ومين ابن الحلال اقابله
وفين خيلي وفين اسطبله
هايم عايم ف كام شارع
ومن مدينه لمدينه
حزينه يادمعتي حزينه
واخر ساعه ورزينه
نسيتها ..بعد ماخطيت
عتب يومي وعتب البيت
لعنت الغربه وما فيها
وكام مره يارتني ماجيت
ياريت!!!
ليست هناك تعليقات:
إرسال تعليق