وعظيم بيمين! ٢٢١
وبدون حلفان.. وعظيم بيمين!
أنا واد مسكين.. من كوم مساكين
وأهو داب النعل وراح بدري.. جري من غدري
والهدمة ما سترت يوم صدري.. يمكن قدري. وشقايا بلاش.
والحلو سمعته في معلومة.. والسكر لو يوم زارني تلقاه محلاش
ونزلت لفوق.. وطلعت لتحت.. وفي حالي سرحت أنا رحت مجاش.
أنا ماشي بضهري وبتقدم.. لنواحي القبر.. أنا قفة صبر
أنا دمعة ما سمعت يوم ضحكة.. ولا كلمة جبر
وأنا لسه أهو كابش ومتبت مستني الأرض أما تنبت وبكيفها تخضر لو حبت. وعظيم بيمين!
تعرفي إن سريسي بحشه.. من غيط الجار
واشتقت أشوف يوم جعدادي..ولا جه ولازار.
ولبست مخطط في مخطط.. وصبحت مزار
والدنيا قلت حركتها.. وبقيت أنا حيلة وبركتها.. برواز في جدار
تعرفي بتزورني كام دمعة.. في الليلة واليوم
وأتهرب من نفسي أتزوي.. وأنفخ بغيوم.
وما بصش ولا يوم في مراية.. وأنسى الأشكال
بقي لغز محير في حياتي.. وبقيت أشكال
وحكايا تسلم لحكايا.. على السيخ أناجوا الشواية
والتيمة حزينة وبكايا.. في لحن الموال
سروالي ملطع كام لوزة.. وفانلة مزينة بخرامها
وأكتافي للشقا محجوزة.. وبتكتم من الحزن آلامها
وإن ضحكت ضحكتها عجوزة.. في شمال الدنيا وأنا أمامها.
الصورة منملة مهزوزة.. بيقطع صوتها في كلامها
مكسور الخاطر بقى حالي..وفي الحكمة أنا حبر
أحكيلك على صبري وخيبتي
وأشكيلك من شوقي لهيبتي
ودي شيلة تقيلة ودي مصيبتي
وعشقت الصبر
أنا لسه بآوح وبعافر.. وعامل جمال
تحويشة جري سنين تبقى صبعان م الشبر
الحالة في خلجاتي أهي دكة.. ورجولي بتجرجر زكة
مرهون وأنا عايش على تكة.. فين عم أمين. وعظيم بيمين!
أنا طمعي ف متر ف أحضانك يتاويني بستر
ليه ف نص البحر يكون قدري. بيدوسني القطر
مرزق من يومي بعيد عنك.. وده حصري ووتر
اتشعبط في القشة أمسكها.. عشمان في البر
أنا بحلم ويمكن جه صابني.. فيروس خبلان
باقي مني وبس يدوب فاضل.. بعضشي إنسان
بسأل في السر وأتوشوش.. معرفش انا مين
اسمع للهمس يجي يقولي اكتم يا حزين
خدت علي خاطري وأهو بحلف
لعظيم بيمين!!!
.......وعظيم بيمين!!!
