رسالة من غزة/د طارق النجدى مجلة روائع الشعر والنثر وفرسان الحرف

 رسالة من غزة ..3

قول لى يا عمي الطبيب

يعنى إيه ..صهيون ..يهود 

يعنى إيه ..رصاص ..بارود 

يعنى إيه حليب ..ُمدَّعم بالهموم 

كنت فاكر ..ده الوطن ..

ألهو ف سماه ..

زي عصفور ع الشجر

و اللا ألعب فى حماه 

و انام ساعات تحت الشجر

يعنى إيه .." غزة الهموم  "

قول ياعم ..

كل شارع.. غرقان ف دم 

ليه تزورنا كل يوم الدبابات

و المدافع .. طيارات ..

كان نفسي ف مسدس خشب

لبس ضابط ..ألبسه 

واجري بيه وسط الحارات 

جانى ضابط...كان معاه رشاش حقيقى 

سد ف طريقى ..و قال لى ..موت 

ولقتنى غرقان في الجراح 

عملت إيه ..؟!

ما عرفش ..ليه 

افتكرت إنه بيضحك 

ضحكت انا ..و جربت عليه 

لقتنى حاضن ..بندقية 

وقال لى ..موت 

كل ذنبي ..إنٍَي بالعب ف الشوارع و الحارات ..

كنت فرحان بالغارات..

قول لى يا عمى الطبيب 

هيا ليه كلمة ..وطن ..عيب حرام 

إني اقولها 

هي لعبة حرام انولها ..

و اللا عفريت ف المنام

لو قلتها .. يطلع لى ..طاخ 

قول يا عمى ..لٍمٔ دمى 

م الشوارع والحارات 

هات معاك لعبة ..حسام ..

نساها فى الشارع اللى فات 

هات معاك ..لقمة ..ما فيها دم 

خلاص ..ما فيش ..المدرسة 

خلاص ..فهمت ..

غزة .يعنى موت ودم 

غزة ..تراب وهم 

يعنى صهيون يقتلونى 

يعني عربى يتسلى بعيونى 

تقول ..آهات ..

طب ليه ..عربى وجبان 

ليه باشوف الامريكان .. ماليين بلادي.

في حتة..وكل وادي 

والعرب ..بتقول .." شالوم "

شاش .. وقطن خسارة عليهم 

حتى قبر كتير ..عليهم 

ليه شالونا..ف تلاجات 

هيه ارضك رافضة حتى 

تشيل ف جثة اللى مات 

يعنى إيه بالروح ..

يعنى إيه بالدم 

قول يا عم ..

قول ياعم ..