احوال!!!_ ١٠٠
ودون تصنيف ولا القاب
ومش شاعر. ولا زجال
انا بين الحروف رحال
وما بين الكلام عايش
وبيطولني كتير اوحال
ماهي أحوال!
يوم عايش مع ال فوق.
ويوم ساكن مع ال تحت
ويوم ماشي ع السكه .
وايام واقع غارز ف الفحت
ماهي دنيا. بتفاصيلها
بطبيخها ان كان مع غسيلها
وبؤجه وادينا بنشيلها.
بمافيها ولو اهوال
ولو مال .الزمن بلا مال. نقول يارب
وان خفت ف يوم احمال. نقول يارب
لو ليلنا عنيد واهو طال. نقول يارب
مفيش غيره ال بينا عالم
ومين آمن ومين خايف.
ومين مظلوم ومين ظالم
وحروفي مشبكه ف حروف.
بتشبهنا ف كل ظروف
وسطري جابر ساعات خاطري
مانا فطري .
وقولي صريح ع لساني
منا منك
ويوم الضحكه تزور سنك
اكون مبسوط .
وارقص وارمي ليها نقوط
وافرحلك لو مره تشوط
ما.نفس الهم. مصاحبني
بيجي يزورني وبيصيبني
يوديني وبيجبني...واروح سارح
ف بكره وقبله امبارح
ومين حصد شجر طارح.
ومين لسانه يحدف طوب
ويصيبني و يكون جارح
بتوصلني همساتك سكناتك
وقولك قلب جلساتك...
.مانا برضه بقول زيك ونفس الحس.
ووداني. بتسمع هس.
وقول تييييت. ساعات وبقص
ومن غلبي....بقول الآه ومن قلبي
تمام زيك مانا وانت اخوات ياعم
دراع واحد ولا بس كم ....وطبليه
وكام جته....ومستوره بجلبيه
منيش شاعر. ولا أديب ولا زجال
انا زيك بنسج م الخيوط أطوال
اشبكها. العبكها
ومش قاصد تكون موال!!!
ليست هناك تعليقات:
إرسال تعليق