عز الليل!!! ٩٨
عز الليل والدنيا سكون...
تسرح ف الملكوت والكون
وسط العتمه والليل نايم..
وبعضشي منه قلقان قايم
ع كام واحد سرحان هايم..
وكل الخلق ف عز الليل
تحت عبايته. تحت عنيه .
شايل جوا ف حضنه حكاوي
فيها الصدق. علي حبة كدب مساوي
وياما حكاوي الليل بطوف
كلامها زياده. ع كام بيت وشوشه محذوف
شايف المبه. الايده هناك
فيه جنبها مقفول شباك.
بيبيع عسليه وحبه ملبن للأطفال
شايف البيت المقفول بابه.
كان فيه عيل. واد بطال
عز الليل كان يخرج يسرق
ويجي متخبي. قال بيربي كتير أشبال.
..عز الليل ومقرب فجر
قبل ظهور ف الضلمه الخيط
تسمع رزعه لباب البيت.
ياااه تترج!!!
ماهي خالتي رطوبه واكله الحيط
ماحنا يدوب البيت ف البيت.
سامع صوت لسلالم السلم
واهي بتغازل. لرجل معيط
علشان نازل
احم. بيقولها لو يتكلم..
بعد صلاته رايح الفرن.
ماهو شغال ومن عرقه يعيش.
يعجن يخبز لرغيف عيش
و جوا الليل. كتير اسرار
المبسوط !!! والزعلان.
والمتغرب. و هجر الدار
اه ياولاد.
اما صحيح الليل ستار.
ومداري ع ناديه وفاديه
وهريدي. والواد مختار. ...
كل الحاره بين جدرانها.
فيها النايم والقلقان
.والتسبيح. وكمان مواخير
وفيها شخير
وفي ملكوت غلبه السلطان.
وفيها دموع.
دمعه لفرحه ومش سيعاك
علي دمعه شاربه م الكوع
ودموع سارحه وهناك رايحه
هاتحسها بتموت م الجوع....
وحبه فكر وحفنه ويل!!!
تسكن كل ثواني الليل.
فاضل منه يدوب ويشقشق
ويدن ديك
وكلب اهو سارح مايعديك
ومعيز عم خميس بتمأمأ....
و صوت يد حديد ف الجرن
تعبت لف!!! .
ماسكاها ستي حميده بالكف
وريحه الزيت ف الطاسه بتغلي مستنيه للطعميه ...
وعمي هلال ماسك للكبشه
وبيقلب ف قدره فول ...
وينده زبده. بس ياريت لو هبشه. انول
بعد دقايق يجي كام عيل
صاحي من جوعه. وتقول غول.
رغم الهيئه.تكلم نفسك
شكل الواد ده ياناس مسلول
عايز فول . مع حزمه فجل وجرجير
ويجري يطير.
الواد راجل بعد الطلق
.وطلع الصبح وصحيت خلق
ونيمانه لسه كتير خلق
وناس بتعدي وناس بتهدي
وناس اهي ماشيه لباب الخلق...
ع صوت عيل. بيقول واء
.ورب الخلق مش ناسي حد.
وبدري مقسم للارزاق.
وذهب الليل!!!
ليست هناك تعليقات:
إرسال تعليق