الوزاره الحلم
.............
عايزين وزاره من هنا
من عندنا
من بيتنا أو بيت جنبنا
تحس بينا كلنا
بحزننا وبفرحنا
وتشيل معانا فى همنا
..
عايزين وزاره
مش بكروت
تفك الكرب
عارفه السكه
بالمظبوط
وشايفه الدرب
تهد الازمه
تعدى تفوت
وتريحنا من اللى دبحنا
وتأكلنا كفته وطرب
ومانجه وتوت
مافيهاش ضرب
لا بخرزانه ولا بنبوت
وتسمع صوتنا
قبل الغرب
وتلغى كمان
ضرب الشلوت
تخف شويه علينا الهم
نعرف حتى نلم القوت
..
عايزين وزاره
تلم الناس
لكل الناس
اللى شارد واللى سارح
ماده ايدها بالامان
ايد تطبطب ايد تصافح
ومهما هيطول الزمان
عين بترعى وعين تسامح
كلنا ولاد البلد
إللى طالح وإللى فالح
دول ولادها بالعدد
مش مركونين للمصالح
احنا حصاد اللى فات
واتعودنا على السكات
واللى اتزرع فينا طارح
..
عايزين وزاره
تمنع تحوش
مش تلملم فى القروش
تحط ابتسامة ع الوشوش
وزاره ضد الكأبه
ضد الغلا ضد الوحوش
إللى خلوا الدنيا غابه
وعبوا خيرها فى الكروش
وترد للناس الكرامه
ترسم بخيرها الابتسامه
وترجع الوش البشوش
والمواطن مهما كان
هو السند هو الضمان
هو الحمايه والامان
واغلى من كل العروش
..
عايزين وزاره
تنسى القرض
وماترهنشى
لاجنبى ارض
الارض حدانا
زى العرض
تبنى مصانع
تبنى مزارع
وتخضرها
الطول فى العرض
قبل الكوبرى
قبل الشارع
يبقى هدفها
تبنى الفرد
يشقى ويتعب
يجرى ويلعب
يربح يكسب
وقت ما يسأل
يلقى الرد
عنده ضمير
ويأدى الفرض
..
عايزين وزاره
بقلب كبير وضمير شفاف
ماتزرجنشى لأى خلاف
ولا فى ثُبات اهل الكهف
تلغى دماغى وتطلب زندى
ولا محسوبه على الاعراف
كل غلطها يترمى عندى
وتزعل لما نروح للكاف
وإللى يعارضك
دوغرى تعاندى
يبقى جاسوس
إرهابى لاوندى
..
إللى يعارضك..... ده الكشاف
مش إبليس منقوع ف براندى
نور بيدلك..... مين كان عندك
الشغل كوهين والاسم بشندى
كان نصاب أو عامل هندى
والمدارى ومش متشاف
..
فين العدل والانصاف
شكل حياتنا
جفاف في جفاف
بتورينى صورة غاندى
وتكسرى فوقى المجداف
ليكو اللحمه بطعم المندى
واحنا خساره العيش الحاف
..
إيه.....؟؟؟ هو انا خرمت
اسمحولى التزم الصمت
هوس.....بس....... بخاف
ايوه................ انا بحلم
انسى ياصاحبى اى كلام
وسيبنى انام
وحط عليا....... ألف لحاف
انا م الاخر ياسطى بخاف
محمد وحيد
ليست هناك تعليقات:
إرسال تعليق