علمت فينا الأيام
أشعار / عبدالناصر عياط
وادى سنة مرت كمان
قدر الزمان يغدر وخان
سرق سنين من عمرنا
العمر هان
وعلمت فينا الأيام
أتغيرت فيه الوشوش
حتى النفوس
صبغ الزمان على وشنا
حط الرتوش
بقينا نشبه بعضنا
جوانا سوس
علمت فينا الأيام
أكبر علام
غيرتنا بدلت صوت الغنى
أصبح شجن
موتت فينا الاحلام
ياما ضحكنا وعشنا
فرح
ودقنا كمان طعم
الألام
وكل مرة كفايا جرح
جرح يأخدنا لانهزام
يطرح علينا الحزن طرح
يكسر قلوبنا
يبان فى نبرة الكلام
علمت فينا الأيام
ساب الزمان بصمته
دى لعبته
أخد الطهارة من القلوب
هو قِدر
ينسج خيوطه ، يفرد
جناحه. هو سطر
مات الوداد زاد البعاد
كره وعناد طبع البشر
كل النفوس جواها مات
والقلوب بقيت حجر
ليه القريب أصبح غريب
مش بتلاقيه وقت الخطر
شبعنا منك يا زمن
كفاية علام
مات الربيع عشنا الخريف
حل الجفا
يا خلق ضاع بينا الحنان
فين الدفا
طرح الندالة هو الخيانة
ضاع الوفا
نفسى يعود زمن العهود
والصدق يرجع ظلنا
طهر يا رب كل النفوس
خلّى المحبة تلمنا
ليست هناك تعليقات:
إرسال تعليق