أنا الدرويش ...
جيت اليوم نحكي لكم
اش دارت كرش لحرام في بلادي ؤفي
نهب ؤهرب جفاء ؤ تشلهيب
ؤ ذاك البوط الثقيل ل دجنوه ...
باش يعفط علي
ما بغاوني نقول لا بغاو غ لعام زين
ؤ باش بغيت حقي في العيش...
غرقوني ف لكريدي حتى لوذنين
زادوني حقرة وميزيرية
أنا الدرويش ل رضعوا الوطن لوفا والاخلاص
داس كل لعدى وقلوب الكياص
الرجلة والكلمة والشهامة والوطنية
ختاريت من علي ينوب ؤ يوصل صوتي
تقلب ؤما عقل باغي غير غلتي
ثقت فيه ساعة تحول فيروس وقضية
بعنادهم سدوا كاع الابواب
ردوها زبونية ووجهيات وزاد الغياب
مكرهوش يبيعوني في سوق العبودية
وانا حر توبقالي اطلسي عنيد
ولد الاحرار ما كنت عبد من لعبيد
ما نرضى ذلة ولا دونية
لكن م خذاو عبرة من الفايتة ي فلان
زادوا طغاو ؤ عواج ذاك الميزان
ؤوضعوا ضدي قوانين وحواجز تعسفية
لي عندو فيلة زادوه فيل ؤعراو درويش
ريبو براكتو ما لقى فين يدفا ؤيعيش
سرقوا حقوا ؤردوه بحال الزايدة عطية
انا الدرويش
البطالة والتمييز والزبونية قصاتني
ولد لكبير ردوه زعيم باك صاحبي بكاتني
ؤولد الدرويش ريبوا مدرستو ..
ردوها كوري يفرخ الجهل والمعصية
في سوق الخواص رهنوها ؤباعوها
ضاعت كل جودة وبالنسخ رونوها
باش يركبوا جهلي وقلة حيلتي والأمية
حتى في الاسعار هاهم زادوا
قطعوا للمسكين مصدر خبزو ؤزادو
ؤفي الغفلة طلعات طلعة صاروخية
ما خلات للدرويش كيف يطفي الغمة
بغاوه يعيش ذليل في الفاقة وظلمة
ثقبوا جيب الكادح ؤم زادوا في الأجرية
ؤهذاك لمرفح ل كاع م مخصوصش
كلشي يجيه فابور ؤزايدها ب السلطة ولفشوش
ولًف الخطفة والفابور والمجانية
ما يشري سكر ولا دقيق ولا حليب
م يدخل زحام عندو حشومة عيب
ؤ الدرويش يدفع ، فآش هاذ الطبقية
انا الدرويش
ل سرق حقو واحد نصاب خاوي سادي
من الحفرة هزيتو ظنيتو كتافي وعمادي
رد حياتي مرار ؤعيشني في الميزيرية
أنا الدرويش فسمعوا لي
***الزجال والشاعر : أحمد الكندودي***المغرب***
ليست هناك تعليقات:
إرسال تعليق