(..اكدب..)=١٦٦
اكدب ...!! بس بأمانه
خلي كدبك يكون مساوي
اكدب!!!
بس. كدبك.. هايغرقك.
ده لو انت ناوي
انت محترف الإنكار
ولا انت هاوي
تمشي تحكي حكايتنا
ع الربابه وف القهاوي
تقول وتكدب
وانا شايفني بين سطورك
الحكايه ان انت مكابر
و للكدب غاوي
اكدب!!!
بس كل كلمه بتفضحك
عارفه مكانك وعارفه
فين مطرحك
وعارفه كمان ايه يزعلك
وايه ال يقدر يفرحك
ومين يطبطب
ومين يسمي
قبل ماطيفه يجرحك..
ويطبطب...وبعدين يداوي
اكدب!!!
اكدب وكابر وقول مفيش
وانكر بأنك عارف تعيش
يمكن تروح منك حروف
تفتن عليك وتقول. مليش
واني ...ساحر
..وكنت حاوي
ولا لخيالك ...كنت مخاوي
......اكدب!!!
حاول تكون ف الكدب هين
وتفتكر انه كان يوم صديق
حاول.. تقول. ده كان حنين
وكان ونيس وكان رفيق
وكان بينصح ومكانش راوي
وحاول تشيل حاجه .لبكره
خلي كدبك .ف الكدب لين
وغضبك مايفجر وقت ضيق
رتب كلامك وحاسب وساوي
بس حاول تخبي نفسك جوه نفسك
ولما تصارحك اسمع لها
هاتهمس تقولك ده للحياه
كان طريق... مصاحبك و هاوي
ولاها تبدل الحقايق وليها لاوي
لكن انا
لما تيجي سيرتك.... هتلاقيني
رغم ان كدبك اذيني
ناسي لماضيك و اقول غناوي
بس أمانه..رتب كلامك
و حاسب وساوي
ليست هناك تعليقات:
إرسال تعليق