يا صاحب القلب الكبير
شعر/ عبدالناصر عياط. مصر
يا صاحب القلب الكبير
عِشت لطيبتك أسير
أنت أصلك نُسك طيب
طمعوا فيك العشمانين
شيّلوك أتقل حُمولهم
حَمّلوا عليك حبتين
قالوا عادي ده قُرَيّب
وإحنا منه قُرَيبين
هم شايفينها نَصاحة
أو عشم
دي بجاحة تِمْلّى عين
يا صاحب القلب الكبير
عشت لطيبتك أسير
أنت شايل فوق كتافك
ألف حِمل
لسه ظهرك ما انحناش
إياك تِمِل
اللي زيك ما اشتكاش
أوعاك تِكِل
ويااللى فاهم انه خطير
خُدها مني كلام صريح
أبو قلب طيب ٠٠حدطيب
مش ضعيف
فارد ذراعه للجميع
إنسان نظيف
كريم بطبعه لو تعامله
تلقاه لطيف
يا صاحب القلب الكبير
وكاتم السر الخطير
موجوع . وشايل كل
أوجاع المحرومين
اللي يحكي ..واللي يشكي
وأنت مليان بالأنين
ما حد فكر يسألك أو
يسمعك وأنت الحزين
ولا مرة قادر تشتكي
حابس دموعك من سنين
مسجون في قلبك الكبير
أسير…ومرمي جوه بير
عايش جراحك من سكات
ألمك في بحر الذكريات
عُمره ما مات
يا صاحب القلب الكبير
الكل عارف إنك صبور
واخد على كتر القاسية
ومش عايزينك يوم تثور
مستكترين ترتاح شوية
وكتير واقف في الطابور
مستني دوره في الأذية
وأنت بطيبتك أسير
واللي يقولك “ده عبيط”
واللي فاهم إنه حويط ٠٠
هو العبيط
بكرة يركن جنب حيط
حد جالي يوم يواسي؟
أو يدافع؟
والأناني ليه شعار:
“مصلحتي” رافع
يا صاحب القلب الكبير
لو ترد تبقى عيبة
وأنت متربى بأصول
فالبعاد دلوقت هيبة
والسيرة الحلوة تطول
الاخلاق بقيت غريبة
السكات أسلم حلول
ليست هناك تعليقات:
إرسال تعليق