عزيزي المواطن
...............
عزيزى المواطن
نام وشتح
شيكا وبيكا
والست ام تتح
انا المرشح المفتح
..
عارف مشاكلك
والظروف
شغل دماغك
فوق وفتح
افتح بسرعه
الظرف شوف
..
٥٠٠ واقفه صاحيه
قول معايا
مصر تحيا
وهاتلى اسمك
م الكشوف
..
انت روحى
انت سيدى
انت تستاهل خروف
مد ايدك
خد بايدى
ونبقى اول الصفوف
..
شوف مصالحك
وايه في صالحك
إن كان عطاره
أو سفوف
..
هى ليله
بس ليله
ونشلوك ياصاحبى تانى
فى اى رف من الرفوف
..
استفاد بال ٥٠٠
الحكايه هيه هيه
جيت ماجتشى
مش قضيه
النتيجه ميه ميه
..
انت كسره أو سكون
زينه صامته للحروف
يالا يا اجدع زبون
قبل ما يلموا الكشوف
..
خليك فصيح
سهل ومريح
وميه ميه
بلاها حريه
وديمقراطيه
خد ياصاحبى
ال٥٠٠
..
مد ايدك
من غير كسوف
مد ايدك
خدها منى
وانت ادرى
ياصاحبى منى
بالمشاكل والظروف
محمد وحيد
ليست هناك تعليقات:
إرسال تعليق