يا صاحب القلب الكبير
شعر/ عبدالناصر عياط. - مصر. - أسيوط
يا صاحب القلب الكبير
عِشت لطيبتك أسير
أنت أصلك نُسك طيب
طمعوا فيك العشمانين
شيّلوك أتقل حُمولهم
حَمّلوا عليك حبتين
قالوا عادي ده قُرَيّب
وإحنا منه قُرَيبين
الصحة لو ليها ضامن
كنت تديهم سنين
هم شايفينها نَصاحة
أو عشم
دي بجاحة تِمْلّى عين
يا صاحب القلب الكبير
عشت لطيبتك أسير
أنت شايل فوق كتافك
ألف حِمل
لسه ظهرك ما انحناش
إياك تِمِل
اللي زيك ما اشتكاش
أوعاك تِكِل
إنت طول عمرك جبل
ما يهزه ريح
وانت باقي عَ المحبّة
بس هُوّ مش مريح
ياصاحب القلب الكبير
ويااللى فاهم انه خطير
خُدها مني كلام صريح
أبو قلب طيب ٠٠حدطيب
مش ضعيف
فارد ذراعه للجميع
إنسان نظيف
كريم بطبعه لو تعامله
تلقاه لطيف
وإن كان حبيبك عسل
خليك خفيف
يا صاحب القلب الكبير
وكاتم السر الخطير
موجوع . وشايل كل أوجاع
البشر المحرومين
العطشانين للحنين
اللي يحكي ..واللي يشكي
وأنت مليان بالأنين
ما حد فكر يسألك أو
يسمعك وأنت الحزين
ولا مرة قادر تشتكي
حابس دموعك من سنين
مسجون في قلبك الكبير
أسير…ومرمي جوه بير
عايش جراحك من سكات
ألمك في بحر الذكريات
عُمره ما مات
والناس تملّى تملّى “هات”
يا صاحب القلب الكبير
الكل عارف إنك صبور
ساقية بيك بتلف تدور
مستكترين تِرتاح شوية
ومش عايزينك يوم تثور
وغصب عنك…مش قاسية
وكتير واقف في الطابور
مستني دوره في الأذية
وأنت بطيبتك أسير
واللي يتجاوز ويسخر
وأنت بقلبك كبير
يا صاحب القلب الكبير
واللي يقولك “ده عبيط”
واللي فاهم إنه حويط
هو العبيط…مربوط في خيط
بكرة يركن جنب حَبِّط
واللي سامع… واللي شايف
بس مْصَمصة الشفايف
واللى عايز بس خايف
حد جالي يوم يواسي؟
أو يدافع؟
والأناني ليه شعار:
“مصلحتي” رافع
ولو أرد تبقى عيبة
فالبُعاد دلوقت هيبة
والانسحاب هو المألوف
والبجاحة تبقى راحة
مع كل وش مكشوف .
ليست هناك تعليقات:
إرسال تعليق