ياعم يانايب
مالناش نايب
..................
مش هتنازل عن 1000
الدنيا ولعت نار
ابلفنى ومن غير بلف
و 200 ماتجبشي فشار
بال 1000 هنعمل طبخه
كوسه ورز وممبار
مافيهاش ولا حتت لحمه
بال 1000 لمون وخيار
..
وماتجبشى لعيل هدمه
غير جوز شربات وغيار
والبت إن طلبت جزمه
شهرين مانجبشى خضار
..
وال 1000 كمان مش مبلغ
ده انا عندى ست انفار
وبياكلوا الغدا اورديحى
ويتعشوا..... ياإما فطار
بحبحها ياعم شويه
ده فلوسكوا بالقناطر
وهتنجح بكرا وتكسب
مش مصرى لأ بدولار
..
انا عارف انك ضدى
شخلل ياحبيبي وعدى
من قلبى اتمنى تعيدو
وال 1000 اقولك زيدو
..
وارجع من تانى اتمرمط
تسلخ جلدى الاسعار
وكلامك كله انا حافظه
هتخدمنا ليل ونهار
الغايب لامه ترده
والبغله هتبقى عشار
والكوبرى لبيتنا تمده
وفى كل محطه مطار
..
إللى مزعلنى ياصاحبى
لخبط عقلى ومحتار
مستخسر فيا ال 1000
وكام ألف يجيبوا حمار
..
وعايزنى ارتاح ماارتحش
ونطلع من اللعبه حبايب
ال 1000 مقدم جحش
قدرنى ياعم يانايب
وبلاش فيا استخسار
انا راضي يقولو انا خايب
قدرنى بسعر حمار
محمد وحيد
ليست هناك تعليقات:
إرسال تعليق