زجلية تحت عنوان:
خرج ***
خرج...
من جحرك وسير تفجج
خلينا من لبيرو ولكليم
رجل على رجل والتعاليم
وبين الدروبة دور وعرج
خرج
على رجليك ؤ شوف
ك بنادم عايش حزين منتوف
عياتو لعبة غلي زير وقج
بل تشوف لحقيقة
حياة الرفاه والفقر والضيقة
ؤ واحد راكب وهمو هايم مبلج
بل محتاج للتعليم والصحة
قوتو وحقو لهنا ولفرحة
لكن زرعو في طريقو الشوك...
سدوا لبيبان والمخرج
خرج
على الحالة وحالها تفرج
شوف آش خاصها ؤ ماليها
واش بقات ك كانت او جوعتيها
زرعتي بالتمييز البغض واللومة...
والأجندات تحت الدرج
ملزم باش تصلح وتتحاسب
دير لافوط تعود في الواشمة راكب
وفي بوعودك ؤ درًج
راه لفي لعالي ما يسمع شكوى
هو مفطح لكرمومة وجروة
هكا حياتو ما يحس مرهط مدبلج
بل الخير والمال وكلشي فابور
ما يعرف سوق لحديدة والشيفور
نهب وخطف ؤ فتح لمخرج
خرج
تفهم الدنيا وماليها
لا تكون من حاميها حراميها
تعود بنادم ومخك ينضج
فشحال من مسكين ماد يديه
انت سبابو حيت حقو هضمتيه
ؤ بنادم قهرو صبرو تعب وطج
الحيرة على لوجوه مرسومة
لغلا والزلط والرحمة معدومة
مرضت النفوس ها الهرج ...
وها المرج
خرج
من ذاك لبيرو ؤ تفجج
سول على ازمات المخلوق
حل لمتاعب ؤدير لفاسد في الصندوق
باركا من التجباد ولكليم ...
زور الدروبة شوف وتفرج
خرج
*** الشاعر والزجال: أحمد الكندودي ***المغرب ***
ليست هناك تعليقات:
إرسال تعليق