زجلية تحت عنوان :
كون فاس***
كون فاس
ؤ عنداك من حس النقص...
والوسواس
او تهان ؤ تحني الراس
حيت زعما على طرف لخبز خماس
الرجل فاس
بعرقو يجيب الريال لحلال
قليل وبالقناعة ما يرضى بسؤال
داهن فمو بالزيت ...
ؤ ما يتمادى على حق الناس
لاباس
باش في الدنيا باقيين الصبارة
واخا الحاجة الفقسة وتمارة
ل سبب فيها كذاب شناق خناس
الرجل فاس
ؤ شحال من مذكر لا همة لا قياس
دنيا عجابة ؤ ما تخليها تركبك
تحسب قيمة لخلق مال والمظهر يغرك
الفقر جامي كان عيب واخا باس
ف رضى واكدح ؤ كافح
خليك نقي لا تذلل ؤ صارح
ما يشريك شلاهبي ...
مالو ب لحرام تقاس
عنداك تقول ما عنديش وتعيش متطرف
تقارن راسك بالناس تولي غير تتخرف
فشحال من خشبة مغشوشة ...
وبالهالة جايبة العين وطعامها مساس
دير الهمة والعزة راس مال
قري ولادك ؤ علمهم يكونو رجال
ؤ سير ب لمهل ؤ خطوي ب لقياس
فوت تشكي وتبكي
حمد الله ؤ ترزن ؤ لعقلية زكي
فهي قلوب لعالي ...
مشمعة بك ما تبالي
وجه النقرة وقلوب الكياص
ؤعنداك ترخاص
تعود دومة معفنة ؤ يدرسوك تدراس
توكل على ربك وكون بو همة وشان
لا تهز هم نقي دواخلك وتهلى يا فلان
ؤبين الجماعة خلي علامك مرفوع ...
صون كرامتك وجامي تقاس
ما تحني لبو مال يردك جربوع
مقهور محقور عايش مخدوع
عبد بلا قيمة ؤ رفسك ترفاس
فكون فاس
حفر هنا وحفر لهيه
خلي الله في حلالك يبارك فيه
الكفاف والعفاف والغنى عن الناس
لمزوق من برا صحاب زمان عليه قالوا
خاوي من الداخل وخا التجريدة وطول خيالوا
معشعش في السحت ولمنكر...
ومن لخبيط ما يصحاش
فعلاش
تعود تراس...
ؤ عند سراق فاسد ما يسواس
بل دار ريال وسيلة
يشري به لهبال نفسو عليلة
صياد لهمزة في بنادم ...
وسوقو عامر بالرخاص
وانت الفاس
دمر وتعب فعرقك تاج
خلي الفاسد النتاف سيكَو لعجاج
ؤ ليه ما تخنع ؤ ما تهبط راس
راك فاس
الشاعر والزجال: أ. أحمد الكندودي ***المغرب ***
ليست هناك تعليقات:
إرسال تعليق