( عود سريس )٢٣٩
هاتولي البحر والزلعه
هاتولي البط في الترعه
هاتولي الطيبه في قفه
ومش للبيع ولا سلعه
هاتولي طحين من المكنه
هاتولي ناس في دور ساكنه
بتتعشا اوام وتنام
وعوافي الصبح باالكنه
هاتولي من الدره كام عود
وهاتو معاه كمان راكيه
وكنكه شاي تروح وتعود
حواليها نحكي كام حاكيه
هاتولي الميه من زيرنا
تكون عزبه وبحاري
وقله ميه بتنقط
عسل من نيلنا الجاري
هاتولي اكله مش موضه
سريس اخضر وجعديده
وحته جبنه فلاحي
قديمه وأصلها بيضه
لا ...كان .كوافير ..ولامشطه
حليب صافي وشوش قشطه
وعسل اسود من البلاص
ولا غلطه ولا قاشطه
ياه ..!!.!!
يافرن ستي يامدفي
وانا متلج وساقع كفي
تخش القاعه الدفا كله
يدفي العيله ويكفي
ده كله راح مع فرنك
وراح غيطك وخوي جرنك
وراح الخير مع المرعي
ومليش دعوه.....!!
هاتولي البحر والزلعه
بقلم ...محمود عفيفي
ليست هناك تعليقات:
إرسال تعليق