( خوبيزه)٢٥٦
راحوا فين..!!!
وفين خالاتي ال ف الحاره
خاله بهيه وفوزيه
وامي والخاله ساره
وفين راحت اللمه
وكام خاله وكام عمه
عايش وجوايا خير منهم
سواء محشي مع بصاره
وكل خاله و بصمتها
وكريمه وليها قسمتها
وخالاتي وكانو مش بالدم
لكن كانو خالات في الهم
كانت امي دول أخواتها
وكانوا هما عزوتها
كانو كام كف في كف
حلل محشي في يوم تتلف
عشان النهارده فيه حنه
وعروسه في الحاره هاتتزف
وفي الحله حاجه حرشه
وغاره لحله الكرشه
علي مهلك ياروح امك
وغمس منهاواوعي تحف
ودي عمايل خاله بهيه
وجنب المحشي ملوخية
وده طرشي عمايل امي
ودي شهقه لفوزيه
فلفل حراق مع آثاره
ودي خوبيزه خاله ساره
وريحه اكل جيباني
نفس واحد مع التاني
لا كنت يوم انا واحد
ولاحاسس اني وحداني
وحشتني الصحبه واللمه
وامي وانا وياهم
وصحبة وطيبه كانت ضمه
وطبليه وجمعاهم
ودي الخاله ودي العمه
وقناعه عايشه جواهم
ومين يوديني للحاره
واشوف حالها ومبانيها
اشم فيها ريحه امي
وريحه ناس عاشم فيها
وكان الحب جامعهم
وحب الخير مدفيها
ودمعه تنزل وياخساره
هاتولي الخاله.. فوزيه
وخوبيزه ..الخاله ساره
........سلام
ليست هناك تعليقات:
إرسال تعليق