زجلية تحت عنوان:
عزرية الدوار***
عزرية الدوار
غطست ف لفضيحة
داست بجهلها لوصية وشوار
عادت مخلوق ممسوخ مطيار
خصها طريحة
في الغيس طاحت طيحة
محال تفيق ؤ توعى و تعود للدار
ف التيك توك وتخرميز كرات
مكات زوقت ؤ بالشطيح تبلات
عادت جثة سايبة ؤطار لحيا والتقار
عزرية الدوار
مسكينة عادت عايشة بايرة
لا عقل لا احساس على الرجل ثايرة
تخلقات تحب واد لحار...
كِ الذبانة والصرصار
ردت الردحة عادة
كلشي تيركل آش هذا
آش ها الماركة...
ل ختارت الزدحة ؤ م قالت عار
قلة ما يدار والواد داها
نسات دينها أصلها ؤ ل رباها
سقاتهم بلفضيحة ؤ عدات بنات الدوار
لمرأة تاج ؤ بفضلها كبرات الشعوب
بالوعي والثقافة ماشي بلفضيحة ولعقل المثقوب
عزة النفس
مجذرة ك لغرس
ما ترهن راسها ف بهوت
لا عرا لا تبرهيش لا خنوث
ؤ على الريال ما تصغار
عزرية الدوار
ذليلة مفضوحة ؤ ب لعرا دارت لمهزلة
دجاجة تقاقي ؤ حطات لحشمة في في لمزبلة
عامرة وهم ؤ الغفلة من سعد الديب المكار
فيا ذيك لعفيفة سمعي نوصيك
تعبي ؤ قراي ولا حد يطنز عليك
تولي خملة وخردة في سوق التجار
بل تطيح سومتك
تهيني هلك وحومتك
تموت فيك النخوة ...
ؤ تسوك ليك الجاية برماد ولغبار
عزرية الدوار
*** الزجال والشاعر: أحمد الكندودي *** المغرب***
ليست هناك تعليقات:
إرسال تعليق