****قصيدة زجلية تحت عنوان :
انا نحني ليك.....******
مدي يا لحمامة لأصيلة يديك....
بالصفا ولوفا أنا نحنيها ليك
نخاف عليك من حطابة الغابة
لكلام لحنين والكذابة
ؤ من قطار الحياه لا يفوتك...
والعمر يهرب عليك
فالقلب بالمحبة والود عامر
عروقو سجينة بيديك تتكابر
خايف ؤ خايف من الواد يديك
فهي هاذ الدنيا غابة
مناشر التغرير ولغة دابا دابا
ؤ ب زواقها تلفك ؤ تجليك
يذبل الورد لي في عينين الهمسة
تعيشي محبوسة ف الوهم حبسة
يعود نفاق ؤ لبهوت دينك ...
ؤ ما تنفعك لا هاذيك لا ذيك
او يشريك رخيص بمالو
توسخي لأصل ؤ يتغير حالو
تصيحي ولا من يواسيك
بل تكون هي الغفلة سباب
نفاق ولبهوت ولعناد
يعيا الصبر من صبرو ...
يتسل ؤ يهربني عليك
او يسلبك شيطان النزوة
ذيك لهزة لِولات موضة والقفزة
تعودي شياطة ....
والذبان يحيط بيك
فمدي حبيبتي بالصدق يديك
بالحشمة ولوقر أنا نحنيها ليك
في سوق الرخا كثاروا الصيادة
لقلوب القاسية ؤ غ لكذابة
تعودي لهاية والشياطة يلعب بيك
ما حبو ما عرفوا معقول فرْواي
ضحك علي نضحك عليك فصغاي
ؤ رغم فقري...
كنزي انتي ؤ ؤ عمري هديتو ليك
فمدي حبيبتي يديك
انا نحنيها ليك
بالوفا والصدق غني
ما تخمي ما تحزني
اولا تبعتي زواقهم...
حتى الضحكة يديوها ليك
فديري يدي في يديك
درهم حلال كافي
حسن من التلاوي ولعوافي
ؤ بالقنعة كافية باش نرضيك
انا نحني ليك
فانت الأصل والزين...
وانا الشمعة في عمق الظلمة مضويك
***** الشاعر..: احمد الكندودي *** المغرب***
ليست هناك تعليقات:
إرسال تعليق