الدُنيا مِنْفاتَه
ــــــــــــــــــــ
الدُنيا مِنفاتَه والكُل ح يسيبها
فاخُدها ببساطه وعيشها على عيبها
ماتشيلش هَمْ وبات من غير ماتحسبها
من فوق سبع سموات رَبَّك مِرَتِّبها
دُنيا وأكيد من إسمها
تعرف قيمتها وحجمها
دى مش مقر دى دار ممر
دى ليها عُمر ومُنتَهَى
مين قال الدُنيا مستاهلَه
نغنى فـــى حُبها أناشيد
غير عالم بالحياه جاهلَه
ومش عارفَه الحقيقه أكيد
ولاتشيل مِنْها فوق حِمْلَك
عشان ماتُقَعش بالشيله
لا فيه غير اللى مقسوم لك
ولا فيه رزق بالحيله
محدش م اللى فارقونا
أخد م الدنيا شيئ وياه
لـــــِ دار الحق سبقونا
لامال جوه الكفن ولاجاه
كلمات / سامى النويهى
ليست هناك تعليقات:
إرسال تعليق