(..نحاس..)٢٧٢
وشوف يابني لما اقولك
في الدنيا ناس
قدمها.... ياما
ع الارض داس
انا كنت يابني
لافف بلاد
دلوقتي يابني بقيت تراث
ازاي ياجدو
احكي واقول
شوف يابني هاحكي
لقصه تطول
تعبت رجولي وداب المداس
عشان حلالي يجي وخلاص
طب ليه يا جدو
هو علامك مفهوش حساب
ولافيه علوم
ولا حتي وماس
هههههههه.....ماس
شوف يابني اقولك
انا كنت وارث مهنه ميراث
عن جد جدي ابيض نحاس
وكنت أسافر كل البلاد
وتحت شجره انصب أساس
جميزه كانت او كات كافور
منها ضله لنصبه تدور
وبالي رايق ولاعمره حاس
و تيجي.ناس
دي شايله طشت
دي شايله حله
وده ابريق. وف اديها قله
وهو كوز ومكنش كاس
والخلق راضي
والكل يابني بقلب ماس
والله يعينك
تقولها القلوب
وهي شايله
علي الكتف فاس
وارد واحرص
مانا اصلي واقف
في الحلة ارقص
وريقي ناشف وطعم مرار
والحله نار
وخالع مداس
تبيض حله بياض القلوب
تفرح لدار
تفرج كروب
وعرقي نازل وده المكتوب
ورزقي جاي
من حاره كانت
أو من ودروب
وكان الحال شبه بعضه
هنا دكه وهنا دكه
وحقي من القروش فكه
وكيله دره واي حبوب
ولاحسبه ولا وعكه
وتفرح الناس وهلليله
وابات في النصبه كام ليله
وانقل في بلد تاني
واعيد الكاره من الاول
واعيش فرحه ماسيعاني
وده يابني كان حالي
وكام قرش ده كان مالي
وفي الاخر نسيتني الناس
وانا دلوقتي بقيت ماضي
وأصبحت ياولدي تراث
ليست هناك تعليقات:
إرسال تعليق