أيام الطيبه
ــــــــــــــــــــ
ماتدوروش ع الطيبين
وماتسألوش فين عنوانهُم
هنا عاشوا لكن من سنين
مشيوا ومجاش حد مكانهُم
خلونا فى الزمن الحزين
الطيبين وَلَّى زمانهُم
راحوا اللى كانوا حنينين
والدنيا كانت حلوه عشانهم
غابوا اللى كانوا محليين
دُنيتنا بجمال طبعُهُم
وزيدى فى دموعك ياعين
وياقلب قول مُشتاق لهم
اللى على زمانهُم نتباكى
اشتقنا لصوتهُم وكلامهُم
فى سيرتهُم نحكى ونتحاكى
ونقول ولا يوم من أيامهُم
وإشتقنا لأيام الطيبه
وسنين ع البال مش منسيه
للناس اللى دموعها قريبه
لقلوب بتدوب م الحنيه
حُضن الونس حُضن الدفا
ونفوس ماتعرفش الجفا
العيشه فى غيابهُم عذاب
ومعدش فى غيابهم وفا
سامى النويهى
ليست هناك تعليقات:
إرسال تعليق