زجلية تحت عنوان:
*** العاصي
ذاك كلام الله
ماشي تخربيق ي لعصاه
المشكل م فهمتي فيه والو
ؤل قراك تلفك ؤ سحرك بهواه
فقبل ما تفتي قرا سوارك
حسب خمسة ؤشد تقارك
ؤ حسن لجم لسانك ؤ لغاه
اش ذاك ل ماشي طريقك و ايمانك
ولكل شرعته وانت مالك
فذاك قران وكلام الله
فكون ماسوني او كاموني
كون كرموسي او ماجوسي
لكن م تكون سخيف
جنس عيان فصيف
والحجة في الدماغ و من سواه
هو لا ينطق عن الهوى
وانت بجوهرو جاهل ؤ على الطوى
لا شيطانك ولا انت عارف معناه
مزروعة فيك لبلاوي
عابر ف الزحمة غ التلاوي
ؤ هكا نملة عدتي والجهل عماه
فذاك كلام الله
ما تفهم قصدوا ومرماه
يبلغوه الصادقين بالأيمان والبصيرة
ؤ ل عينو فيها خشبة رؤيتو قصيرة
ؤ لمريض بحالك ليه اش رماه
فربط لسانك راه غ تيسرر
حلل الزنا ؤ باقي يطرطر
ؤ نسى انه في الذل صاغر
لكن هبيل شيطانو غزاه
من صغروا رضع السحت ولحرام
تربى وسط الخش لإجرام وجذام
ما يعرف ملائكة ؤ لكذوب مغناه
ظنها دايمة
شحال نتف كان كاوية
ها هو وسط الطامة ...
والغوت وراه وراه
مسكين مكواه
بقى غ ذيلو ل تيشطح
م مرزن غ تيرفس ؤ ينبح
كرهوه لعباد ولا حول ولا قوة الا بالله
ؤ باش هان كلام الله
عاد مسخرة
زعما من صحاب الشكارة
م ندم م حشم ...
ؤ م دار باش يلقى الله
*** الزجال والشاعر: احمد الكندودي *** المغرب ***
ليست هناك تعليقات:
إرسال تعليق