علي الكرسي
ع الكرسي أهو قاعد
ملك ومتوج ع عرشه
قريب الود.. ما تباعد
رموش العين كانت فرشة
وهي توشوش الكرسي
تطاوع الوشوشة العجلة
وراسمة البسمة حضراها
ووقتي البسمة مش آجلة
وبيشاور.. تقول حاضر
تجيب كوباية للمية
يبوس إيدها.. عليه تطبطب
تروح عينها مندية
وراسمة ع الخدود بسمة
وضحكة وراضية بالقسمة
وهو ماشي قدامها
دليل الدنيا "سي السيد"
يحوش نسمة معدية
وهي..
بحلم تمشي للأيام
وبتبني وبتشيد
آمال بكرة وحدوتة
وراضية وماضية مبسوطة
وبتمشيه وتتمشى
سميطة ودقة تتعشى
ترش الملح كام رشة
عشان خايفة من الحساد
تلف الكرسي وتقوله
فداك وردي فداك فلة
وتنزل والعيون في العين
صحيح شايف مكانك فين؟
يرد يقول:
أنا سبقتك في نني العين
ياخدها يضمها في صدره
وحاضن الخد أضلاعه
تحس بالدفا كله
ما بين أحضانه ودراعه
تدق كل حاجة فيهم
ينادي القلب أتباعه
يهفهف الهوى يطوح
ينادي الشوق وليه تقوله:
"يلا بينا بقى نروح"
ليست هناك تعليقات:
إرسال تعليق