ميمي!!! ١٩٩
مِعزة وطقت في دماغها
تبيع وتفرط في مصاغها
وتشتري قال شعر عيرة
وتفلفله وتسبسبه
وتلونه. . وتهببه
وتبعزقه وتسيبه
وتورنش بهباب صداغها
وتقص بالمرة الضفيرة
وتعلي في كل الواطي
وترمش والعين تطاطي
والمستور ماعادش منه
وميت خسارة!
كان خداع الحلم ساطي
ولو نظرك مرة خانك
وشوفك فيها اتكعبل
هتتجنن وتتزعبل
وعقل يشت يتساءل!
وأيه العرض والمغزى؟
وفين راجلك يا دي المعزة!
وليه بنشوف؟
يكون حلمك في آخره خروف!
لكل بروز صرفتي ألوف
في كام حتة على الجتة
وبرز العالي من "الكاتة"
ورسمتي لكام "تاتو"
ولونتي العينين خضرا
وضحكاتك أوام حاضرة
وفي "الإتيكيت" بقت دارسة
وصاحبة كيد بقيت فارسة
بقت أستاذة ومحاضرة
وكام فيديو يقول "جرسة"
إزاي بتلوني الضافر؟
وكام "باي باي" وبتسافر؟
وبقت للدكتره ممارسة
وهارسة بمشية البطة
وبتركب الرموش قطة
وبقى اسم الدلع "ميمي"
وكان أصله زمان "بطة"
... وأسترها يا ستار!
ليست هناك تعليقات:
إرسال تعليق