مسحراتى منقراتى
…………….
مسحراتى منقراتى
شغال بهاتى
وشايل سكاتى
وكاتم اهاتى
بالقفل والمفتاح
..
مسحراتى منقراتى
الدنيا باخت
شابت وشاخت
ولونها باهت
سوادها بس متاح
..
مسحراتى منقراتى
يوم فى ضحكه
ويوم فى اه
والحياه ليها اتجاه
..
ومش اى ناحيه
والشر فارد سطوته
فى كل ناحيه
والبومه صاحيه
وليها ألف جناح
..
مسحراتى منقراتى
عارف حدوده
حابس لسانه
داخل خدودو
ماشي بنصيحة
جده وجدودو
وبرده مش مرتاح
..
مسحراتى منقراتى
عشان ما يعلا
قالولو طاطى
وطا بسعاده
لكل واطى
بقت حياته
سداح مداح
..
مسحراتى منقراتى
بينده فى سوق
بينده وخايف
بصوت مخنوق
بيصحي ناس
عشان تفوق
من صغر سنه
واخد خازوق
بيعانى منه
مسا وصباح
..
مسحراتى منقراتى
من أمة واعيه
ل اُمه نايمه
اصل الحضاره
يا ١٠٠ خساره
لشاكوش وشطه
وحمو بيكا
وقبل منه صلاح
..
مسحراتى منقراتى
منيماتى
بدندن خفيف
يا عمى نام
واعمل كفيف
جايز تمطر
والبعيد يرتاح
..
لا مسحراتى ولا منقراتى
انا جى اهزر
وابلع سكاتى
نام وشخر
نفض سريرك
افرش وبخر
نيم ضميرك
الدنيا ضاقت
وهى واسعه براح
..
مسحراتى بحلم ليلاتى
لو فجر بكرا
يجي بدرى
قبل بكرا
أو بعد بكرا
بس يجي
كنت أغنى
واشتغل مداح
..
ساعتها ممكن
الدنيا تحلا
تضحك تزهزه
نكبر ونعلا
لو يجي بكره
نغتنى ونرتاح
.محمد وحيد.
ليست هناك تعليقات:
إرسال تعليق