مسحراتى السحور*
..............
مسحراتى منقراتى
فى الحوارى الضيقه
فيها الاصاله و الحضاره
وفيها البيوت محندقه
والغلابه والفقاره
والعيشه صعبه مزنقه
…
اصحا يا ابنى
غلبتنى
مش هبطل دقدقه
اصحا بقى
بكرا نشبع تريقه
اليوم طويل
تعب وكد وشقى
..
اصحا يا مندو
نده عليك
الواد عبده
سبقك وراح
عند المترو
عشان يوفر
حق الباص
..
لسه تانى
حنوفر
م التراب
وشى اتعفر
من شبرا ماشى
لحد انشاص
..
لا مكفي اكل
ولا ندى دروس
من كل حاجه
بقيت مفروس
غداكوا مش
من البلاص
..
بدل الغاز
راح نبنى كانون
وبلاها شاى
نشرب ينسون
وجع الجيب
غير وجع الراس
..
العيب اكيد
مش عيبنا
فلوسنا هجرت
جيبنا
تدخل وتطلع
وتسبنا
وبدل ما تسند
تتعبنا
غرقانه عايزه
١٠٠ غطاس
..
لا تسد دين
ولا تستر عيب
م البنطلون
قطعت الجيب
واخد مساحه
وشكله غريب
بستخدمه
منديل وشراب
جنيهنا بقى
كداب هجاص
..
فلوس غريبه
بترعبنا
كل شهر تغلبنا
بتيجى بس
تأدبنا
وبعد يومين
نشهر افلاس
..
الشهر كله بنهاتى
وسلف يوماتى
من اخواتى
واسبوعين
عند حماتى
زهقنا بجد
زهقنا خلاص
..
اصحا ياواد
نيمتنى
وهمك كمان
شيلتنى
وع الدقدقه
شغلتنى
مسحراتى منقراتى
وهمى زايد
عندى منه اقفاص
..
ماسكه الدنيا
مزمزئه
ومزنقه
اصحا بقى
اصحا وفك
الشرنقه
زهقنا امل
اكلنا ملل
بنفطر صبر
من الغلا
بقينا رخاص
ليست هناك تعليقات:
إرسال تعليق