مُجرد هَمس
ــــــــــــــــــــ
لما لسان الحق اتْشَل
لما ميزان العدل اخْتَل
اللى حقوق الناس مِهْنِتْهُمْ
وقفوا فـــ غزه مع المُحتل
لما انكشف الوش وبان
وظهر غش الــ مش إنسان
اللى ادونا دروس حُرّيه
طلعوا يدافعوا عن السجان
لما ضمير العالم غاب
فك لجام الظُلم وساب
يافلسطينى إيه مستنى
م اللى اتربوا على الإرهاب
لما قلوب الناس تِتْحَجَّر
عادى بيوت الناس تِتْفَجَّر
عادى يموت الطفل فــ مَهْدُه
فوق اتنين مليون يتْهَجَّر
لما يكون العالم شايف
عارف فين الحق وخايف
أى كلام عن حقى وحقك
هوَّ مُجرد همس شفايف
سامى النويهى
ليست هناك تعليقات:
إرسال تعليق