..روح الروح
ياروح الروح
خدتى معاكى بسماتى
ولعبى م المسا للصبح
وسيبتى دمعى وأهاتى
وطول الصبح
أدور فيها وين انتى
كفايه غياب
ياسيبانى وواخده الروح
وجعلانى جسد مدبوح
أنا بالباب
تعالى إفتحى حياتى
وخلى م الهنا روحى
ترفرف جوه جناتى
ياروح الروح
يا فاتحه نفسى للدنيا
فين لعبك
فين ضحكك
وفين ألقى هَنا حضنك
غيابك عنى فى ثانيه
قلب كل الحياه عتمه
وخلانى أتوق للموت
م انا ميت
إيه يعنى جسد موجود
بدون الروح
أنا الشاهد وانا المشهود
منين ما بروح
بشوف طيفك
ينادى م السما روحى
تنادى بكل شئ روحى
ياروح الروح
تعالى كفكفى دمعى
تعالى واملأى سمعى
حنينا من تفاصيلى
وًجُودى لى ببسمات
تملأ كل أركانى
هنا ضحكك
هنا لعبك
هنا بكاؤك
خصامك كى أصالحك
هنا بؤسا
هنا موتا
هنا هنايا فارقنى
ورحل معك فى قبرك
وغادر من هنا بسمك
وقد وُسّدت أحزانا
وغطتنى فراق الروح
فصرت كأنى أكفانا
تدثرنى ثنايا الروح
ورنين ضحكى
بيبكى كل مايحكى
ويسرح يلقى ف عنيكى
هنا للروح
يجيبلك كسوه فى عيدك
يفوق يلقى أكفانى
بتلفك
كما روحى اللى شيلانى
واشبك إيدى فى إيدك
تسيب إيدك لجدرانى
تهد الدنيا فى روحى
أفتش فى ركام همى
الاقى الحزن ما يسمى
وأبكى العمر لفراقك
يا واخده العمر فى كفك
يامفارقه وسيبانى
أعيش إزاى من بعدك
فراقك خد معاه عمرى
إمتى الموت يجمعنى
وأحيا فيه من تانى
جسد مع روح..
ليست هناك تعليقات:
إرسال تعليق