#أمتى #هانتمهمز #؟؟؟
وين العروبة وين الشهامة بقينا ملناش وش
إيه اللي جرى ها … هنقعد كتير ما نتمهمزش
نترحم على أيام عشناها أحرار بلا غش
يا خسارة راحت لحالها ولسه ما رجعتش
وأدينا لسه عايشين بنقولها معلش
دا مصير المكشر يضحك أوي ويبش
والحظ يرجع يتفرد ومعنا ميتكرمش
ومصير المهدم ينبني ويعلى ميتهدمش
ونصلح اللي أنكسر ونجدد كمان العفش
وتداوم نُـسورنا تصوب على الهدف وتنش
ويدب فينا الامل وبجناحاته الكبيرة يهش
وعن قلوبنا ننفض اليأس البغيض ونش
ونرجّـع أيام البطولة وإن قومنا ما نقعدش
إلا بنصر مبين وبغي العِدا ما يدمش
دا إحنا رجال وعلى الظلم ما نسكتش
رجال حافظين للكرامة صاحيين ما بنرمش
لا بنماين للباطل ولا بنخاف ولا بنكش
رجال كيانها دهب بيور متتزيفش
أصحاب مفهومية وذكاء تلقطها من غير دش
صاينين العهود وعن الحق ما بنحِـدش
ونقول للي عامل أعمى وحاسبنا مبنفهمش
انت أعمى القلب والبصيرة إحنا منتغفلش
صحيين لقولك وعملك نتايجه مبتكدبش
أملنا في الزمن يدور وهنقوم مبنكسلش
ناخد بتار الثكالى والطفولة خلي غليلنا يفش
هدموا حيطان الدار فاكرينا ما بنرجعش
هنبنيها من تاني أصل احنا ما بنرحلش
زارعين في ولادنا الحقيقية وحقيقتنا مبتموش
كأشجار الزيتون والتين عن أرضنا منغبش
بدمنا نفديها وبالروح دا شهيدنا متترددش
شبعنا أغاني وتطبيل لكلامكم مبنصدقش
ولغير حي على الكفاح قلوبنا مبتسمعش
ونصر الله قادم ولغيره مبنفزعش
وربنا سبحانه النصير ولغيره مبنسألش
#مصطفى #عبدالرحيم #الفرا
كل الامنيات الطيبة الجميلة الراقية لكل القلوب الجميلة الطيبة المخلصة للقضية العربية والاسلامية الفلسطينية
ردحذف