حديث القصعة ..1
من غير حشيش من غير خمره
وسهرانين تحت القمره
بنقول كلام ونعيد ونزيد
اول كلامنا صلاتنا عليك
اخر كلامنا سلامنا إليك
يا نبينا يا أجمل انسان
صلى عليك المولى وصان
وعلى ذكرك في الأكوان
اشكي إليك الحال.. والحال
مش خافي أبدا على إنسان
ياما قلت بكره هيحصل إيه
تزيدوا وتسودوا الأكوان
والأرض تسجد للرحمن
طول ما أنتوكده دايما ماشيين
رافعين راياتكم جواه قلوب
لا تخاف ولا تعرف محبوب
غير الإله واحد قهار
و لما تنسوا و تبقوا أسود
على بعض لكن .. قدام ديب
تجروا ولا جري النعام
وتقولوا كنا. ..وكنا..وكان
ولا تدروا كده على فين رايحين
يا نبينا يا أجمل إنسان.
يا نبينا صدقنا كلامك
حصل صدق كل كلامك
وبقينا في القصعه يا طه
وليمه وصاحبها الخايب
عازم عليها يهود والروم
تغرف تصول زي ما بتروم
وتقول هنا وقف عندك
بلاش يا شيخ تلبس قفطان
ممنوع تقول عبد الرحمن
خليك كده مونت كريستو
ولا خريستو والا امريكو
ده اسم جنان..
بلاش عسل وبلاش رمان
خليه سوسيس هوت دوج .. يا دوج..!
خليك كده شيخ و مروّشِن
خد سلاح خليه في البيت
زي اللعب ..زي الكراكيب
اضرب اخوك و قول له ده عيب
وكل حاجه لينا تبيع
بيتك ..و زيتك ..حتى البحر
واعمل أغانى ..وفيديو كليب
الله عليك ..نسناس شاطر
فاكر يا واد ..".سليمان خاطر"!!؟
يا نبينا صدقنا كلامك
حصل ..صدق كل كلامك
وبقينا في القصعةيا طه
يأكلونا .. ونقول الٱهة
بالإذن منهم و الله كمان
بقى هو ده أخرك يا زمان
بعد الحسين ..وصلاح الدين
يبقى اليهود واقفين ماسكين
عصاية على باب الإسراء
زين العرب بقوا فيه أسرى
دم الشهيد بقى زيت.. بترول
و عرب ..طرب ..خايفين م الغول
ام العيال قاعده بتلطم
فين الرجال فينك يا صلاح
يا سيف ..يا خالد ..يا جرَّاح
وِلد العرب اصبح نسناس
يتسلوا بينا في كل مكان
بقينا في القصعه يا طه
ياكلونا ونقول الٱهه
ونوطي صوتنا كمان ونخاف
الله اكبر يا نبينا ..
نسينا والله ..كده ..نسينا
بنصلي.. بنحج ..و بنصوم
لكن بقينا هنا رهينة
والأقصى .. و القدس مدينة
بتدق أجراس النسيان
آخر الزمان وللا بنحلم
وعيوننا مفتوحه يا رحمن..!
دم الشهيد في جنين و القصر
وغزّة ..عِزة..بقت أناشيد
هدوا علينا بيوت غزّة
ولسه بنقول العزة ..!
ارحمنا يا مولى يا رحمن
و سهرانين تحت القمرة
دخان حشيش وكاسات خمرة
ونغني وبنرقص ونعيد
كلام كثير زي المواعيد
جانا الفرج من فين م الصين
يأجوج.. ماجوج ..خليكوا فاكرين ..
خايفين على اللقمه وع الباب
واقف حرس وكمان بواب
بيقول هويتك ..تذكرتك..!!
ممنوع دخولك ..تذكرتك
تغيّر الاسم وترجع
وانسى الحسن .. وحسين .. محمود
خليه جوزيف.. شمعون .. سمحون
ٱخر الزمان ولا بنحلم
ما تفوقه يا عباد الرحمن
ما توزعوا القهوة السادة
ياسادة يا عباد الرحمن
دخان حشيش وكاسات خمرة سهرانين تحت القمرة
ونقول جهاد ..وجهاد ماتت
ايام فاتت
علينا صلوا صلاه غايب
وكل واحد له نايب
م الخيبة ..ياخدوا
فين تايهين ..
طبرق نوفمبر 2023
ليست هناك تعليقات:
إرسال تعليق