زجلية تحت عنوان:
معايا او ضدي***
معايا أو ضدي
ؤمنين ما عمرت دلوي...
حتى انت سكَِي
نبغيك نسخة مصادقة
حال فمك دابة ناطقة
ما يكون لك راي ...
ولكمالة من عندي
فلسفسة التفاهة
الجهل والخرافة
انا مول لحكمة والفاهم
بقى في جهلك متكي نايم
لا تقرا بعينيك ...
بل اقرأ بعيني
فقط سمع ؤ حل ودنيك
لفهامة زعامة ؤبعيدة عليك
انا مول السداد ...
ؤدورك تصفق لي
معايا او ضدي
كلام الناقصين
لي سدو باب الحقيقة تالفين
اختزالية وسوق لقطيع يغلي
هكا بغاوك
ما تْخَدم عقل تبع لي عطاوك
وخا يكون السرج بالشوك يدمي
او تكون حتى سفسطة او تفاهة
انت صفق وسكت فردك سفاهة
ما بغينا عقلية ناضجة...
بل بنادم مخو مصدي
كون مجرور مرفوع تابع
هزيل خانع فجيني طايع
او نصنفك متطرف ...
ونبصم عليك بيدي
هكا عادوا في السياسة والدين
طغاة ضد الحق المبين
تحت لحجر وضعونا ذوك لملاعين
تعود طبل شابع خبيط مزوي
اودي اودي
اش هاذ المخلوقات العدمية
رافضين قول الحق ولفوا الدونية
ؤ في بحر حيالهم بغاوك دون مقصي
لا وسطية ولا اعتدال
كلشي متشدد ؤلحال حال
إما معاي واما ضدي
*** الشاعر والزجال: احمد الكندودي *** المغرب
ليست هناك تعليقات:
إرسال تعليق