قصيدة./
بلياتشو
وستارة بتفتح من تانى
عن قصة عشق وشوق وحنين
يتمنى يعيشها البنى ادمين
وسيناريو بيحكى عن الاشواق
هنعيش حكايات ويا الابطال
وهنفضل نحلم بالتفاصيل
وقلوب بتئن وقلب يميل
على ناى وربابا نقول مواويل
وبيطلع قلبى على المسرح
يستعرض حكاويه ومشاعره
وبكل شطارة وذكاوة
بيسيطر على كل الجمهور
لكن مين باصص جوايا
على وجعى وحيرتى وبكايا
انا زى البيلياتشو فى وشه
باسم ورموش عينه حزينة
بيخبى مشاعره فى بترينة
وبيرسم فى وشوش الدنيا
نغماية وضحكة بلون الشمس
لكن معذور..
مين حاسس اه يا ناس بأنينه
مين فاهم انه بيتألم
لو كل الكون يوصف حيرته
ولا عمره فى ليلة هيتكلم😢
أميرة_مهران
ليست هناك تعليقات:
إرسال تعليق