سراب!!! ٢١
هاتولي بكره مش امبارح
ونسمه و الشجر طارح
هاتولي خير سطوح بيتنا
وكل الخير من المالح
هاتولي الزلعه مليانه
بجبنه ومش عمرانه
وكلمه ترم طمرانه
وحشمه الدنيا مش قلعه
هاتولي مره لو نابت
وهدمه ساتره.مش دابت
وفرح ف حضننا نابت
وانا ودموري. ف الترعه
ياخلق ياهو بقيت سلعه
بقت شطه وبقت ولعه
وطعم الدنيا بقي ماسخ
نزلت القاع بقيت راسخ
وفاض الكيل مرار طافح
ومش سكر لكن دلعه
هاتولي نفس وقناعه
هاتولي شهم مانطاعه
يكون اصله سايق عقله
شاكم حاكم وليه طاعه
هاتولي الفطره من امي
هاتولي الحكمه من ابويا
ولو غايب يكون عمي
حاكم اختي مع اخويا
هاتولي دقيقه او ساعه
بقينا ازياء بتتحرك
وساعه الفحص تشرك
قرود ع الشجر طالعه
جمال ف الوحل تتبرك
وهيئه بس خداعه
ده علم م الحصير جسدي
ومات مهموم وراح اسدي
وخوف الله واقي ومسدي
مفيش دنيا ودي اشاعه
هاتولي ايامنا وبصاره
هاتولي طبليه ف الحاره
هاتولي جزمه من باتا
وطز ف جزمه لو زاره
بقينا كراتين فيها بضاعه
شربنا الهم ف رضاعه
ودب ف الجسد علات
ولاتحصين ولامناعه
ليست هناك تعليقات:
إرسال تعليق