انت عارفه !!! ١٨
عارفه لما تعجز المعاني!!!
ياسمره... عن وصفك!!!
لما يتلجلج لساني
من خوفي ومن عصفك!!!
رغم ف الاسفلت عضمي
وانا راضي يزين رصفك
ومش شيفاني
عارفه حاجه.... ولا قولك
عارفه شمسك.!!
عارفه... ضلك!!
هو فين!!
ولا فين باقي وفضلك!!
توهت منك و توهت مني
رغم عمري… رغم سني
كنت نفسي ف مره أغني
واتغني يوم بحرفك
عز شوفي اشتاق لشوفك
كنت نفسي ألمح لطرفك
شوفي اسمي
شوفي رسمي
اكتبيني مره طرفك
ولو مره ع الهامش
واكتبي جنب اسمي
اني عايش
واكتبيني ف كشوفك
عاشقه ليه بس لدفوفك
خليني لو مره ضيفك
اويزورني لحظه طيفك
اكون ف طوبك…
اكمل رصيفك
نسمه.عابره قلب صيفك
ومش راضيه
دايما غلباني... بالقاضيه
ومطهومه... لكل الناس
ملهيه وعندي مش فاضيه
تكوني مني غضبانه!!!
تكوني عني مش راضيه!!!
انا نفسي تكون باديه
ومش حسباني
من الحرافيش
حرفوش منكوش لابس طربوش
عليه اسمك
وواشم ع الدراع رسمك
وجنب الرسمه
كاتب امي
وراسم قلب بيتحبب
وكام علامه لتعجب
ولفظ يارب
وامي ولا مش هيا
ولا حتي بتبني
اكون انسي اكون جني
اكون اسود اكون ابيض
ولا انا وحدي لوني بني
كتير الفكر يقتلني
وعامل ناسي …
يوم ريحك لفح اسي
وتاهت الخطوه مش راسي
وماتوه منك
وعلي عيني وع راسي
وعامل بوصايا في ديني
وبسم الله...عليك اسمي
رغم اساك. لكن راضي
واقول ....امي !!!
ليست هناك تعليقات:
إرسال تعليق