لا تحاسب ***
لا تحاسب
بنادم وخا ما يكون فيك راغب
إلا إلى طغى وبسال
ما قبلو خاطر ما بغاه بال
عَلّي عليه حيوطك ؤ بْلا ما تعاتب
كون مول لقلب لكبير
طهر نفسك ؤ بقى ولد لخير
سامح واعفو ولا تعاقب
الناس حال وأحوال وظروف
النفسية مريضة مطلية ظن وخوف
خلي كتاب لمحبة مفتوح...
وعلى احسانك واظب
لي خايب مع هذاك زين مع ذاك
مول تعمار الشوارج لوحو وراك
كون باش ترتاح وتْرَيّح...
ذاك لعفيف النقي الصائب
لعقول الجافة بالود زرعها
لبساطة ديرها ازهار ووزعها
راه الحب والخير بهم الناضج ديما غالب
هورها وزيد
كَاع الناس حباب لا تجبد عيب
دير ودنيك صمكة ترتاح من لمصايب
بنادم تخلق بالخير روحو فواحة
هذا طبعو خسارة الجهل والنباحة
لسمموا لقلوب وبات الشر غالب
فسامح
صبر وخا لغا لمرضى لجارح
نقز لهوتة ...
ومسح بالطيبة على الخد الناحب
فهو ابليس هدفو التنوعير ولعداوة
منذ الخلق ملتو عفونة وشقاوة
رافض تفوح لقلوب محبة ...
وعارو في الناقص صاخب
سكينة الروح والرحمة فينا طبيعة
الطمع ووسخ الدنيا عادت دريعة
عدنا عديان
حيت مات فينا لحنان والانسان
لفوحان ولكلام لعايب
وخا بنادم بعيبو سقاك
راه العلة تما التطبع وارى هاك
راسي ياراسي لهزان ولقراقب
لا واحد راضي بالظلم والأذية
في الاخير يندم ويقول بنادم يقى فيا
وخا مجرجر خوه وعلى همو راكب
لا تحاسب
واطلب الله للأحوال يصلح ويصاوب
تزهر الرحمة والانسانية
يسالي التمييز والكبرانية
تعيش سعيد والقلب هاني
الشماتة لا تعاشرو والحرطاني
ومع الخيّر الأصيل كن صافي...
وتجنب لعوافي ولعقارب
لا تحاسب
*** الشاعر والزجال: احمد الكندودي *** المغرب
ليست هناك تعليقات:
إرسال تعليق