( عم مخلص )٣١٨
عم مخلص ملوش نايب
ابص عليه الاقيه خايب
واشوف الحسره ع الجبهه
ولا واكل ولا شارب
ملوش في اللف والدوران
ولا عنطوز ولا جعران
ولا بايش ولا دايب
اقلب فيه الاقيه متعاب
وعم الخسه فيه عايب
وليه الحيره من كومه
ومين قسم ومين فرق
ومين واظب ع لومه
وليه عنه الفرح غايب
وليه واقف لوحده في جنب
وليه مزوي وملوش انصار
وكأنه عايش ف حياته بذنب
ونفاق حاكم عليه بالنار
وحيد لاخل ولا قرايب
وحسبينه من الكفار
واشوف نفاق نافش ريشه
وكل الخلق بتعيشه
وبقي قسمه ومكتوبه
لوحش من القفص سايب
هاتي يا دنيا ع الاخلاص
وحطي عليه حمول شيله
ولمي الخلق وكل الناس
بكام.... زفه و.هليله
بصوت عالي يقولوا عليه
خرج بلا حمص من الليله
تروح ايام و تيجي ايام
ومخلص يلقي ليه نايب
ومنافق يموت من الحسره
يتوه ف الحياه وشايب
ملوش فكره ولا ذكري
يضيع قطره يكون غايب
وساعه الفرحه مايلاقي
ولا بسمه ولا حبايب
ليست هناك تعليقات:
إرسال تعليق