(ياعم روح )٣٢٠
مشيني يابني
اسمي اسمعين
وهمي جابني
اقف بعيد
واركن يمين
وروح واقف
آخر الطابور
مكنش عاجبك
روح يلا وامشي
او روح وغور
ياعم عدي
وروح وفوت
ولا اقولك
ما تروح تموت
من سكات
ومسمعش صوت
ال زيك
مشيو وراحوا
راحو هنااااك
ركبوا التابوت
وريحونا
بتقول ايه يابني
قصدي ارتاحوا
وماتاعبونا
يعني يابني
هااقف كتير
الله اعلم
علشان اجيلك
جايب معايا
حتي السرير
والصحه راحت
وبقيت ضرير
شايفك طشاش
غرقان ف بير
طب روح يا عم
آخر الطابور
من غير حكاية
وروح وغور
ورينا ضهرك
ولف دور
طب بص يابني
دول كام شريط
سكر وضغط
وبالعبيط
وبلاوي يابني
حبه شمال
وكبشه يمين
ولسه هاجيب
الانسولين
الله يعينك
ما تقول امين
مشيني يابني
اسمي اسمعين
ولا عمري داين
وديما ..مدين
وماشيه زق
والله معين
ياعم ارجع
آخر.الطابور
هانده عليك
واقف ف دور
وانا مالي بيك
تكون انت مين
ان كنت بطرس
ولا اسمعين
اركن يمين
وتعالي بكره
بدري وفي نور
من غير حكايه
وروايه زور
طب بص يابني
الله يسامحك
بكره يجي
وزمنك يدور
وتبقي ف سني
وتقف ف دور
تقابل ال زيك
وساعتها يقولك
يابويا رووح
ياعم غور
ليست هناك تعليقات:
إرسال تعليق