زجلية تحت عنوان:
لحيط لقصير***
خْرج
من ذاك لبيرو واعرج
على ذيك الأرياف المنسية
العطالة والفاقة والدونية
ركب كل جبل وفج
تحرر من عقدة الامر الناهي
مول السلطة والمال والتباهي
وعلى الام الناس وصياحهم لا تفرج
سول وسقسي
ذاك المحتاج والشباب المنسي
خفف ضيمو وقاد سعدو لمعوج
وقف سبع ؤكون ولد الناس
ذيك العجرفة حيدها وملك الأحساس
راه بلغة انا السيد بنادم عيا وطج
طبطب على المظلوم وحيد العنصرية
كلنا ولاد تسعود آش هاذ الهستيرية
هز بالنفسية لعيانة رتقها بالمحبة وانسج
فذاك لي تسيد وجمع السلطة والمال
لاكْليم ولحديدة ما فكر في قسوة الحال
بغى يتمتع غ هو يعيش ويتفجج
ما خرج
ما سول على احوال الناس
ضمن حياتو ؤشطب على ل قهرو الباس
كدات الفتنة وتنصل المسؤول وللنار اجج
بتحراميات هرسوا الأمن والامان
كان بنادم ف ضعفو دبا عاد طرزان
ما غار على لبلاد وعلى النائي ما عرج
أو على ذيك المدرسة والسبيطار
ولا بين الدروبة جال ؤحس بالذل والعار
الرجل على الرجل وفي البيع وشرى مروج
وانت موت او عيش
مصلحتو هو وينتف ليك عليها الريش
ضاعت لمروة والرحمة ...
بات لعقل بالنقص مجلج
فهم عقول العصافير وأجساد البغال
نهبوا الحق فظنوا انهم الشان رجال
الكسدة مزوقة ولداخل خامج
فكاع ذاك الهزان يا فلان
دليل ما عشتيه من نقص وحرمان
وعوض تاخذ العبرة وتدير لخير...
لعب عليك نقصك ؤصبحت نصاب مهرج
الناس كاملين بحال بحال
ك ولد الشطاب او عالي لمقام
لمساواة والعدالة ولسنن الحق خَرًج
خْرج
او فتح بروك ا ؤ تواضع
عيب تشوف جفن الدرويش دامع
نصفو ؤ سد على الغشاش لمخمج
خرج ...
من ذاك لبيرو واعرج
كون اصيل منصور بدعاوي الخير
لعريان كسيه والعطشان دير ليه بير
المهم تحرك وشوف احوال الناس...
راهم ادميين ومحي طبعك لمهيمج
بل تعطي لقيمة لذاك لحقرتيه
درتيه حيط قصير ؤ نقزت عليه
توب لله وحارب ذيك الأنانية
راك ماتدي غير كفن فصفي النية
تشرب من عوينة لمحبة راحة وللخير تنسج
*** الشاعر والزجال: احمد الكندودي *** المغرب
ليست هناك تعليقات:
إرسال تعليق