الرحايا! ٢٠٣
ولسه بتلف الرحايا
طحنة بسمة. طحنة نسمة
وقسمة وشوية تحايا
لكل ركن وكل زقة
وكل ناحية في الناحايا
والعزيمة بقت دشيش
ألف لفة.. تزيدها لفة
والطحين مش ملو كفة
والأمل مفضوح بزفة
لما طرحت أرضي هيش
عدوا اسمي من الضحايا
ودوخة صابت الطحين
وهم لخبط للعجين
كله جنسه صبح هجين
اسمي وقصاده مليش
والرحايا العقل خانها
جارشة للمطحون سنانها
واللي شاري واللي هانها
واللي راح ضيع مكانها
كـ الطاووس نافخ لريش
كفه ماسك ميت محايا
نفسي مرة أكون وأعيش
نفسي يوم كتكوتي يكبر
ولا ألحق أشوفله ريش
يمشي يتعايق بعرفه
أشتكي إن صابه طيش
وراح وبعزق للقروش
نفسي أنسى حزن ساكن
في الأماكن والوشوش
نفسي أقطع كل شجرة
فيها للنعيق عشوش
وربك أعلم بالنوايا
والرحايا رايحة جاية
والضحايا تزيد وهي
دايرة ترسم بالرتوش
ولا يوم تعبت وكلت
حقها واخداه متلت
يتقمص صبري يشلت
وزمري اخره يكون فشوش
او حليم فيلم الخطايا
عظمي سامع صوته جاي
صارخة تضوي تقول يا جاي
هو أنا مش إنس منكم؟
فوق دماغي دب طاخ
شملولة وهمه في دراعها
عدي سرعة ألف ماخ
ومين يحوش؟
ألف دبة بميت شاكوش
الرحايا ما رحمة انسي
كنت فاكر إني منسي
فاكراني ثلاثي وجنسي
وحش كاسر من الوحوش
وجف حبري من الدوايا
والمر و ة صابها نوه
دشملت كل الزوايا
ولسه.... بتلف الرحايا
علمت نحتت رتوش!!!
ليست هناك تعليقات:
إرسال تعليق