ذكريات! ٢٠٨
مش لاقيني!
ولا موجود ع الخريطة
ولا باقي مني قالب
ولا حتى ضل حيطة
تهت مني والمعالم اتغيرت
اتبعترت كل الصور
الّلي يوم كانت محيطة
البكا سامع رنينه
أما شوقي الله يعينه
اشتاق للمّة وفيها زيطة
فين حبايبه؟ فين صحابه؟
كانوا ورد ف توب يزينه
والوصية كان حافظها
زي ما اتعلّم ف دينه
وهو ده كان شارعنا
هنا لعبنا وقرصنا جوعنا
كان هنا الكُتّاب بتاعنا
وهنا حوش المدرسة
الّلي ياما بشقاوتنا سعنا
والّلي جنبه كان جامعنا
وجنب منه مؤسسة
كله ولّى..
كله من خيالنا جلّى
كله سايب ميت علامة
وميت ملامة وألف معنى
صدى صوت الذكريات
صوتها باكي بيناديني
رنة النبرات ف ودني
طلّ هلّ دون ميعاد
صوت لخالتي أم ميلاد:
"خد يا واد!
خد تعالى يا نن عيني
شوف ميلاد روح ناديه
هتلاقيه.. هناك بيلعب
هتلاقيه وسط الولاد
غاب بقاله ساعة غاطس
بس هاته قوام ف يدك
يلا روح.. مستنياكم
ع الفطار فوق السطوح"
فول وطعمية وبطاطس
والسِّنة فضة تصيبها خضة
ومالك يا قلبي!!!..
وأنا يدوب قدامها عاطس
كفها بلهفة لضهري
خوفها إني أبقى فاطس
وخوفها واحدة من الصفات
فين هجيب دي الذكريات؟
والشريط بيدور ف بالي
فكر خدنا ف الشتات
للّي عدّى والّلي فات
للّي عايش والّلي مات
للسبوع.. يوم بيومه
جمعة.. حد.. أو تلات
وذكريات!
ليست هناك تعليقات:
إرسال تعليق