غفلات! ٢٠٢
طب وأعمل إيه!!!
كانت مواربة وقفلت
وفارقني كل شعاع لنور
لا غمضت ولا غفلت
صبح كل خضاري بور
أركاني بيسكنها الوهن
وجداري معزول واتدهن
أسود .
والفاتح رمادي
لما سألت؟ قالولي عادي
روح وغور!!!
يدي وخدي وحسرتي
وسطي وضهري وكسرتي
بعيدة المنال متختمة
والحوجة ماشية ملتمة
ف عز شمس معتمة
وكفي خاوي من الماجور
والأتب كلبش في ضهري
شرياني بينادي ( أتور )
والدموع شقت لنهري
وميت سؤال زنه يدور
مين اللي سارق ضحكتي؟
وجاب لشرد في ضلتي؟
والنسمة ال كانت يوم تطبطب
ليه اتبدلت ولسعها كور!
بقى نصيبي وقسمتي
حظ وكل عيونه عور
تايهه وشاطحه دفتي
بعدت لهدفي وضفتي
تاه الجمل جز الصبور
فين نوتي.. فين قوتي
وليه بس غايب شطنا؟
ومين ال عايب لطنا؟
إيه اللي شاطب خطنا؟
ننزل بحور نخطي لقنا
وعوجة على ميت منحنى
طولت في وقوفي الطابور
ماجاني. بس مين جنى؟
محاني . والعود انحنى
والحد حده حاد يجور
كات واحده مني مغيبه
مرضي بواحده وطيبة
اتنين طشاش وصبحوا عور
وبقى اللي باقي مش أنا!
والصبر طيب...
ليست هناك تعليقات:
إرسال تعليق