بنتى بتصوم
..............
بنتى نور عيني
سادس سنه بتصوم
تسهر تصحينى
وتقفش المعلوم
تقعد لحد الفجر
وتصلى قبل النوم
تضحك تدادينى
نحله تلف تحوم
تسألنى عن دينى
والوعد والمقسوم
ازعل تهدينى
وتقول ياعيب الشوم
ضحكك يجازينى
بالخير ف يوم معلوم
زعلك يودينى
للضنك والزقوم
..
وتقول يانور عيني
بحق شهر الصوم
ماتزود المصروف
بتقول بصوت مكتوم
الدنيا صبحت غلا
بتغلا يوم عن يوم
وعك الزمن عكه
ومين مهوش محروم
ال١٠٠ بقت فكه
ماتجبش حق الدوم
بادعياك تزور مكه
تزود المعلوم
..
ولا اعمل طلب إحاطه
واهاتى من البلعوم
نفسى فى الشوكلاته
وبيتزا بالمشروم
وبيبسى بالشفاطه
ونسكافيه بالفوم
زهقت أكل بطاطا
وحووشى كله شحوم
..
سايق عليك النبى
تزود المصروف
اقولها بالاجنبى
ولا اقولها حروف
بحق شهر الكرم
ماعدش فيها كسوف
..
خت منى ضرايب
وخصمت م المصروف
وخصمت نص النايب
وبدل اللحوم خرشوف
وتقولى ماحنا حبايب
وبصل المحب خروف
..
ماكنش لينا الدايب
والرصف والمرصوف
ولولا الملام نتعايب
الاكل ناخدو سفوف
..
احلف براس الشايب
مسيرنا بكره نشوف
الخير فى بتنا زكايب
والبر والمعروف
وكل عام ياحبايب
نقول مسيرنا نشوف
محمد وحيد
ليست هناك تعليقات:
إرسال تعليق