كان ..شاعر
كان شاعر وكان ..إنسان
وكان هربان من النسيان
و كان حلمه علي شطك
جبل عالي وراه أنوار
وع النوار ..كتب اجمل كلام ليكي
يناديكي..ويحلم يوم
يعدي الشط...يرجع لك
اتاري الشط ..
كان كام خط في الصورة
عليه بتطيرى عصفورة
بلا مركب..ولا مرسى..ولا ملاح
وكان سواح ..وكان يا ما كان
كان الحلم في الغربة
و آه من لوعة الغربة
من الفرقة..وم الحرمان
و آه من قسوة النسيان
...
النور ..كل يوم بيطُلْ
والفجر ..ف ميعاده يهِلْ
والحلم ..اللي تاه بيعود
وكان موعود بأحلامه
في نفس الليلة ..نفس اللحظة
نفس الحلم ..يتوه ويعود
عصفورة علي الصورة
تطير وتحط
وتزقزق ..كما تزقزق
يجوز فرحانة ..نشوانة
يجوزعطشانة .ولهانة
يجوز تايه ..كما احلامه
ويتحقق ما يتحقق ف ايامه
وتاني الفجر ...بيشقشق
وترجع صورة أحلامه
جبل عالي ..وراه أنوار
وشط وخط في الصورة
شجر نوار
أوراق الزمن ..جفت
وشجر العمر يتلفت
ويطرح ع الغصون..أشواق
و تبقي زهرة النوار
تعطر تاني ..نفس الحلم
نور الفجر ..ينده لك
ندا الحيران
ده كان شاعر ..وكان إنسان
وتاه منك ..وضاع منك
ومات في الغربة ..مات من قسوة الانسان .
مرثاة شاعر
طبرق ٢٠٠٣
ليست هناك تعليقات:
إرسال تعليق