زجلية تحت عنوان:
احنا الشعب ***
احنا الشعب...
ل هاز شعبو
في الفرحة ليه نسعدو
وفي لقرح يد وحدة ...
لا بهوت لا لعب
كللنا الله بتاج الخاوة والهمة
نتبغاو بصدق ونسدو بتعاونا كل ردمة
نزرعوا لبلاد تضامن واليد في اليد
حنا الشعب
لا هزان لا فوح
عْبار ف لميزان ؤ لغلة قمح وبلوح
ؤ ل تعدى حدو معاه وحقروا...
ما يجني غ الشوك والشطب
حنا الشعب
ذاك الصبار وسط القسوة ولعجاجة
املنا في الله كبير سبوعة للخيل سراجة
صُنِع في المغرب...
فسيفساء من الاصل والنقرة والذهب
حنا الشعب
في الأزمة ما نتراجع ما نتغلب
ركايزنا الله الوطن الملك ...
والحر فيه وخا ظلام اللحظ ...
ما يخون ما يتهد
بل ما يرهن بلادو ؤفيها يذم او يسب
بينا والفساد مسافة
حتى ذوك لبغال لي ولفو لعلافة
عبيد فرنسا والغرب
ذوك ل دايرين فيها حقوقي
عامرين تنوعير سلعة جلوقي
يبيعوك وبلا ضمير ينتفو لك الزغب
غدا لحساب هو لحساب
فتعلم يالواطي ك تعد وتحسب
بل قضي ايامك تاعس...
على نار الظلم لِشعلتيها في القلب
ؤ فين باغي يا لمجحوم ...
من محكمة شعبي تهرب ؟
وراك وراك يا لعيان وراك
ما بغينا شناق ولا سمسار ولا افاك
حنا الشعب وجامي نخليو بيض لحرابي...
يفقس ويرد لقلوب مطلية جرب
فسير بعد وبعد
ما تستاهل تكون مغربي فحيد
وحنا المغرب شعارنا ...
فتلاح يا القب
حنا الشعب
لي هاز شعبو
ؤعليه ما يتبدل ما ينهب
غدا يطهر لأرض من لكلاب ولحناش
ذوك لتاجرو ف الانسان وزادوها بالتفشاش
نتفوا لمسكين الريش والزغب
فيا بلادي لا تحزني لا تشكي
شعبك كبير كريم جواد كُمري
حنحان شجيع وعلى لعدو كابوس ورعب
هو ل يطهرك من ذياب لكارة
ل سدوا الطريق ورماو الصنارة
يزهر الخير ونبلغو الرفاه والمجد
حنا الشعب
*** الشاعر والزجال: أحمد الكندودي *** المغرب ***
ليست هناك تعليقات:
إرسال تعليق