إشتقت لأبى/د طارق النجدى مجلة روائع الشعر والنثر وفرسان الحرف

 اشتقت لأبى رحمه الله..استاذى الاول .أول من علمنى الكتابة والتعبير والخط ..سالت دموعي ..استغربت ابنتي. كيف تبكى أباك وأنت شيخٌُ كبير .. 

لا تدري ان بداخلنا طفل كبير ..!

.علمنى أمسك بالقلم 

علمنى أسرار الحروف ..سر القلم 

وقال لى...عيش ..من غير .. ألم 

دمع الرجال..خامس مستحيل.

مهما كان همك جبل 

مهما كان حزنك جبل 

اكتب ..دموعك ع الورق 

اياك يشوف ...دمعك بشر 

يا تعيش بطل ..يا تموت شهيد 

كان بطل ..عدي الزمن عليه ..

و مات ..لكن ..ما مات 

فاتنى نسخة من حنانه ..و اشتياقه 

م الرجولة ..فارس و سيفه كلمته 

يا رب عفوك ..يكون لقاه فى جنتك 

والدي الحبيب ..اكتب لك ايه ..!!؟

ستين سنة ..ادعى لجنابك كل يوم 

وكل ليل ..

ولما اشوفك فى المرايا 

اشتاق إليك ..ما أنا نسخة منك 

ازاي اضمك..وانت ساكن جوا مني 

ازاي اضمك وانت  ساكن جوا منى.

يا بوي  ..يوم علمتنى 

ما قلت لى ..أخفى اشتياقي ازاي 

لما الحبيبة تصدنى..

وتقول كفاية ..حبنا ده مستحيل 

الحب ذنب !؟ 

واللا خطيئة ..؟!

ما تقول لى يا باه..

الحب فى الشيبة ..حرام ..!

و اللا عجايب الزمن ..!؟

أشكى لمين ..

أبكى لوحدي ع الورق 

وامسح دموعي ع السطور 

طب قولها ..

ابعت لها روحك ..و اطلب ودها 

معلش يا باه .. 

مهما كبرت ..قدام جنابك 

لسه ابنك الصغير ..

افرح واطير ..لما تقولى يا. ولد 

نسيت يا بويا في الدروس..

درس نسيان الحبيبة ..و الوداع  

يومها قلت ..بكرة تكبر ..

هيا تعلمك ..

الحب يا باه ..مش خطيئة 

العشق ..شلال اشتياق 

و أكيد قدر ...

من غير سبب ..

كان نفسي يا با ..تكون معايا 

قول لى اعمل ايه 

قولى لى اعمل إيه 

قلبى شلال اشتياق..

دمى ..طوفان الهوي ..

ما قدرش يا باه ع الفراق ..

العشق فى الشيبة ..حرام ؟!

واللا يا باه مستحيل ..