زجلية تحت عنوان:
شمر على ذراعك ***
شمر على ذراعك
مالك ماد يدك ل ردتيه عليك السيد
حيت زعما محتاج وكنتي السي السيد
رخصت راسك وما حفظت قياسك
تعب وب لحلال جيب ريال
لا تهين نفسك وتذللها بالخطفة والسؤال
شد في موزع الأرزاق ؤضمن حلالك
السعاية ولحيالة جامي كانت حل
حطتي راسك لِ لغلاظ ؤ ذقوك الذل
قضيتي ايامك هزيل مايل ميزانك
لفقر ما هو يا لغافل عيب فافهم
عزة النفس حميها لا تمد يد فاحشم
قليل ؤ مداوم وتكون القنعة راس مالك
عنداك يغريك مول المال
يبان ليك كبير وهو صغير محتال
راه بحقك سمان ولوى ذراعك
بل عندو صبحتي مجهول عديم
نحت منك مخلوق وضيع ذميم
حيت فرطتي في العزة والذل دق بابك
شمر على ذراعك
حفر في الصخر ؤ دير لمجهود
الله فرق الارزاق فاكدح والخير يعود
لكن بغيتي لفابور والدرهم الساهل
جمع ولم فشوف وضعك بظلامو حايل
نسيتي ان بالنصب و الاتكال هدمتي ولادك
ورثيهم الحقرة ؤعادت الذلة وسادك
فنوض كد وجد واملك النفخة اناري مالك
قري ولادك جنبهم الذبحة
راك على افعالك فقدوا عزهم والنخوة
غدا يكبروا رعاوين ضايقة بهم لمسالك
او منك يتعلموا الدونية
ولد السبع سبع وولد لحدية غ حدية
ؤحيت انت هبيل كسول شاطر ف لمهالك
شمر على ذراعك
لا تاخذ الذلة حرفة
وخا تجمع لكثير تعيش الرجفة
ناقص والقلب مريض عارك
صفي حسابك وفعالك
دير الهمة تاج وصون مقامك
فالمكسي بديال الناس عريان ...
موسخ وجهو وعلى الجمر بارك
بصح المال يعطي لصاحبو قيمة
يعود كلامو حلو والسي سيد ديما
ملة اهل الكبر لفقدو الانسان...
او شفار شناق نصاب ولي سرق احلامك
فشمر على ذراعك
لا تلاح على حق الكادح الحر الصافي
تدي لو حقو وتزيدو ألم وعوافي
يطليك لحرام ويريب حمار دارك
بل يحشك الله حشة
كسب لحرام يمشي في زهو الليل فرسا
ما تبلغ فلاح ويخسر عرامك
فشمر على ذراعك
لا تمد يديك ؤ كافح
ما تصفق ل كان سباب ولسانك صادح
او ذاك ل بضعفك ساير تسلا
ذلة النفس النقص والحصلة
فتعلم ترقى وخطيني من هبالك
شمر على ذراعك
تعب و ب لحلال جيب الريال
لا تمد يديك باغي كلشي بالمجان والسؤال
شوهتي اهلك و لبلاد ولعباد...
رديتي السعاية حرفة وطاح شانك
شمر على ذراعك
*** الشاعر والزجال: احمد الكندودي ***المغرب ***
ليست هناك تعليقات:
إرسال تعليق