( العتبه. )٣٤٠
وكان.. ابويا يناديني
يقولي يابني.....خدني.... عديني
وقولي خطي العتبة
وكان يضحك
وانا اقوله بتضحك ليه
يقولي كان لسه امبارح
وكنت ياواد يدوب لسه
تخاف تجري من البسه
وانا اجري عليك ملهوف
وف ايدي..ماسك الحطبه
واعسك
الاقي هدمتك رطبه
ما تقولي ياواد
..يابه خطي للعتبه
ويروح....... ضاحك
طب شيلني ياواد ع اكتافك
واجي اشيله....يقوم ضاحك
يقولي ياواد هاتشيلني. و بتفكر
ياواد ده انا بس بتذكر
يقوم ......ضاحك وبيكركر
عليك ياولدي طمني
يقولي ياواد انت قريب مني
واكتر واد يا واد شبهي
وانت دون عن اخواتك
تزيد عنهم بكام رتبه
ما تقولي خطي العتبه
يعيد ....الضحكه من تاني
وانا رايح ماتنساني
وخد بالك انا ماشي
ويطبطب علي اكتافي
بكفه ال كان دافي
وكله ياواد رايح حافي
وانا اقول له رايح فين
ماهو انت معايا وفي ايدي
يابويا ودنيتي وسيدي
ده انا بيك ساند ضهري
ده انت الدم في وريدي
وانا ولدك
ياواد اسكت.
خالاص كتبت الكتبه
ياواد الموت بعت مرسال
وجاتني قالتلي الخاطبه
ويقوم ......ضاحك
ما تقولي ياولدي
طب اقولك ....انا ماشي
واخر مره تخطيني
وتعديني للعتبة
وراح..........ضاحك
ليست هناك تعليقات:
إرسال تعليق