*بحبك*
...............
يارافعه الكفاَّءه
ومنعا الزكام
يااجمد واعلا
كمان م الحمام
ياشوربه ونخاع
تمام التمام
يافته وبتاع
حلال مش حرام
يافردة كوارع
يااصل الغرام
الشوق ليكى عدا
حدود الكلام
...
بقيتى بربع ألف
امامى زى خلف
لغلاوة إللى فيكى
هنحُط ليكى بلف
وزفة موالد
وقُبه ومقام
...
ياجامده وعاليه
يازينة المسامط
اسعارك ياغالية
مافيش ليها رابط
قطمه ف جَنَابك
هتطلع بكام
...
ياعلاج الكآبه
ومزاج الغلابه
ياشحنة جراءه
وفهم وحداقه
وشورة المدام
...
هتبقى الكوارع
وفراخ المزارع
أكل الأكابر
وزباين
صبحى كابر
ولينا حرام
...
مع انى كنت غاوى
للكبده والعكاوى
وبعشق المشاوى
واكل الحمام
...
نسينا طعم اللحوم
بتغلا كل يوم
بندَّارى فى الهدوم
وبناكل م الوعود
كلام محشى بكلام
...
مافضلش م العجول
لينا غير الرجول
كمان مستكترنها
حشينا بطونا فول
حرام..ياناس حرام
...
ياولاد الحلال
الحال .........
على اد الحال
سيبولنا اى نايب
م الفشه والطحال
وارجع مره شايل
كارع لأم العيال
آي حاجه والسلام
...
ناس بتقول كلام
راح تبقى بالجرام
زهقنا م الغلا
وكُتر الهرتله
حرام إللى إحنا فيه
حرام يا ناس حرام
محمد وحيد
ليست هناك تعليقات:
إرسال تعليق